Kryeministri i vendit, Edi Rama, së bashku me ministren e Ekonomisë dhe Inovacionit, Delina Ibrahimaj ishin të pranishëm sot (7 tetor) në një biznes për të folur për mundësitë që jep programi “Dyfisho sipërmarrjen tënde”.
Fillimisht fjalën e mori ministrja Ibrahimaj, e cila theksoi nevojën për rritjen e investimeve dhe zgjerimin e sipërmarrjeve shqiptare, duke nënvizuar se bizneset duhet të përmbushin standardet dhe kriteret në përputhje me rregullat e Bashkimit Evropian.
“Biznesi në fazën që Shqipëria është ka nevojë të rrisë investimet, dhe ka nevojë të dyfishohet. Sigurisht bizneseve do t’u kërkohen të përmbushin standarde dhe kritere, të cilat janë konform rregullave të BE, me qëllim që të jemi konkurrues në tregun vendas dhe më gjerë”, tha ministrja Delina Ibrahimaj.
Kryeministri Rama u ndal te kushtet e financimit, duke bërë me dije se skema ofron kredi me interes deri në 2%, garanci shtetërore deri në 70%, financim deri në 2 milionë euro dhe afat shlyerjeje deri në 10 vjet.
Ai theksoi se deri tani janë miratuar 32 kredi me vlerë 5 milionë euro, ndërsa shtoi se numri i bizneseve që janë në proces është 400.
Sipas kryeministrit, ky është një plan, i cili synon të ndihmojë bizneset e vogla dhe të mesme.
“Ne kemi krijuar këtë skemë, e cila faktikisht ofron një kredi me interes deri në 2%, që është një kredi praktikisht shumë e butë dhe me një garanci shtetërore deri në 70%. Financimi shkon deri në 2 mln euro dhe afati shkon deri në dhjetë vjet. Është një kornizë shumë e favorshme e bërë enkas për biznesin e vogël dhe të mesëm për të gjithë ata që kanë një ide dhe një plan se si mund të rriten, por që ju duhet financim. Ky është programi. Shohim një rritje të interesit. Praktikisht kemi sot që flasim rreth 400 biznese që janë në proces. Kemi praktikisht deri në datën 5, që janë shifrat, janë 32 kredi të miratuara për një vlerë që shkon te rreth 5 milionë euro. Na vjen mirë të shohim ritmin e përshpejtuar“, tha Rama.
