Koloneli dhe hartografi prof.dr.Myslym Pasha në një lidhje telefonike për Report Tv pas vendimit të prokurorisë deklaroi se vendimi është antikombëtar.
Ai u shpreh se për këtë çështje vendimin e dha Gjykata Kushtetuese unanimisht dhe cdo vendim tjetër është kundër interesit të shtetit shqiptar.
“Habitem, por çudia në Shqipëri vazhdon të ndodhë dhe kjo është shumë e rëndë. Veprimi i prokurorisë është jashtëzakonisht i rëndë, si shumë të tjera që janë bërë” tha ai.
Sipas Myslym Pashajt, ata që kanë firmosur këtë marrëveshje janë fajtorë. “Janë totalisht fajtorë, sepse pa luftë drejpërdrejt, shteti fqinj të rrok një pjesë të detit shqiptar, pa luftë e mori për vete, është një tradhti kombëtare. Dikush për këtë duhet që të përgjigjet” deklaroi ai.
Intervista e plotë
Prokuroria ka pushuar hetimet, cili është komenti juaj?
Në Shqipëri nuk është çudi të dëgjosh lajme të tilla, kjo është e tmerrshme. Ndodhin gjëra që kanë qenë dhe janë në dorën e drejtësisë shqiptare, që përmbys një nga ngjarjet më të rënda, jo në pikëpamje diplomatike, por integritetit tokësor të Shqipërisë. Le të marrim për një moment sikur mediat shqiptare, një gazetar të mos kishte takuar një gjeograf, marrëveshja ishte firmosur nga të dy palët Basha dhe Bakojanis. U hodhën fishekëzjarre dhe 350 m2 det i kaluan Greqisë, kërkush nuk bëri asnjë hulumtim dhe rastësia ndodhi që mediat e kërkuan dhe specialistët nxorën fakte të hatashme për grupin e punës dhe ata që firmosën këtë marrëveshje. Habitem, por çudia në Shqipëri vazhdon të ndodhë dhe kjo është shumë e rëndë.
Pra firmëtarët janë fajtorë?
Po janë totalisht fajtorë, sepse pa luftë drejpërdrejt, shteti fqinj shteti të rrok një pjesë të detit shqiptar, pa luftë e mori për vete, është një tradhti kombëtare. Dikush për këtë duhet që të përgjigjet. Gjykimin e madh e dha Gjykata Kushtetuese dhe u përqëndrua në gravitetin kombëtar të këtij problemi dhe nuk ka kush ta zbusë, veprimi i prokurorisë është jashtëzakonisht i rëndë, si shumë të tjera që janë bërë.
Është një zonë me rezerva nafte?
Edhe sikur mos kishte qenë me pasuri, ai përsëri ishte deti i Shqipërisë, një hapësirë e madhe. Është një hapësirë që ka gaz dhe naftë. Interesat e dy vendeve janë shumë të mëdha, kur kërkimet të afrohen, dy shtetet do të ballafaqohen. Në cdo pëllëmbë asaj hapësire është e integritetit shqiptar dhe kush e cënon është anti kombëtar, shkelës i lartë i këtij standardi.
