Kryeministri edi rama ka shpërndarë një tjetër njoftim për qytetarët përmes llogarisë së tij në facebook ku ai kërkon sërish mendimin qytetar për situatën e administratës. Këtë herë Rama u drejtohet qytetarëve të ndajnë çdo eksperiencë negative në zyrat e shtetit.
Sipas tij, qytetarët kanë të paktën një eksperiencë negative që duhet ta denoncojnë, edhe me emrat e zyrtarëve nëse dëshirojnë. Ai tha se historitë e qytetarëve do t’i shërbejnë grupit të punës për administratën
Postimi i Ramës:
EKSPERIENCA JUAJ NEGATIVE
Shumëkush prej jush ka të paktën një eksperiencë negative, të jetuar apo të dëgjuar nga familjarë a miq, në zyrat e shtetit. Do t’i isha falenderues kujtdo prej jush që do ta ndante një eksperiencë të tillë këtu. Nëse do të kishte edhe emra konkretë drejtuesish a punonjësish të zyrës përkatëse, edhe më mirë akoma.
Për të bashkëqeverisur me sukses në katër vitet e ardhshme është shumë e rëndësishme që çdo njeri i zakonshëm, të ngrejë zërin kur del i pakënaqur apo, ende më keq, i fyer nga një zyrë shteti. Platforma e Bashkëqeverisjes SHQIPERIA QE DUAM, e cila do t’ju jepet për gjykim në formë paraprake në fillim të javës, do të sigurojë lidhjen tuaj direkte me kabinetin qeveritar, edhe për rastet e eksperiencave negative në zyrat e shtetit.
Komentet tuaja në këtë postim, na ndihmojnë shumë për të nxjerrë një raport të veçantë për grupin që po punon për reformimin rrënjësor të rrjetit të zyrave të shtetit.
Faleminderit dhe mos ngurroni ju lutem
