Ish-oficeri i policisë Dritan Zagani sqaron se banda e Habilajve ka nisur aktivitetin që në vitin 1998. Ata bënin jetë luksoze, megjithëse zyrtarisht merreshin me biznes fruta-perimesh. Kujdeseshin për skafin e Saimir Tahirit në Vlorë dhe sipas tij sa herë që ish-ministri vinte në Vlorë hane drekë me “kushërinjtë”.
Ishte i pari që denoncoi lidhjet e Saimir Tahirit me Habilajt, gjë që solli përplasjen me ish-ministrin. Tani ish-oficeri i policisë Dritan Zagani jeton jashtë vendit, por në një lidhje me emisionin “Opinion” sqaron se si ra në gjurmët e Habilajve në Vlorë dhe lidhjet e tyre me Tahirin.
Zagani thotë se Habilajt mirëmbanin një skaf të Saimir Tahirit dhe sipas tij sa herë që ish-ministri vinte në Vlorë hante drekë me kushërinjë Habilaj.
“Lidhjen farefisnore me Tahirin e kam mësuar rastësisht nëpërmjet një skafi të vogël, por të them të drejtën nuk është përdorur për trafik droge ai skaf. Ai skaf ishte nën emrin e Saimir Tahirit, atëherë deputet i opozitës. Habilajt e mirëmbanin. Ishte gomone me ngjyrë gri. Aty mësova që mjeti ishte i deputetit dhe këta ishin kushërinjtë e deputetit. Në dijeninë dhe informacionet e mia sa herë vinte në Vlorë Saimir Tahiri hante drekë me ta”, ka thënë Zagani.
Ish oficeri i policisë tha se Habilajt kanë pasur lidhje me oficerë të tjerë të policisë së Vlorës, të cilët bënin të pamundur nisjen e hetimeve.
Ai ka rrëfyer gjithashtu se grupi i Habilajve operon që prej vitit 1998 dhe si aktivitet kryesor kanë drogën.
“Kanë qenë elementë të kontingjentit të mirënjohur nga ana ime. Kam njohje profesionale të këtij grupi që në vitin 1998. Aktiviteti kryesor ishte trafiku i drogës. Në vitin 1997 ishte një fushatë masive e mbjelljeve të drogës, këta kanë qenë kryesorët”, ka thënë ai.
Por a kanë biznese të ligjshme Habilajt? “Shumë vonë kanë hapur një biznes legal, në vitin 2010 që kam kërkuar informacione më të thella kishin hapur një biznes fruta-perimesh import-eksport me Italinë, dispononin vetëm një kamion të zi. Nga dyshimet e mia hyra me bindje që ta verifikoja, këta bënin maksimumi dy rrugë në muaj në një kohë që mjetet e tyre ishin luksoze, bënin jetë përrallore, kishin shpenzime shumë të mëdha”, ka sqaruar Zagani.
a.ç
