Dy vajza të reja të moshës 20-vjeçare rezultojnë të zhdukura prej muajsh. Vajzat e zhdukura janë shtetaset me inicialet R.Q. dhe S.J.
Të dyja këto raste nuk kanë lidhje me njëra-tjetrën, por denoncimet në Policinë e Tiranës kanë mbërritur në të njëjtën ditë nga familjarët e tyre.
Edhe pse familjarët kanë humbur kontaktet prej mujash me vajzat, mësohet se denoncimet janë bërë vetëm dy ditë më parë në Komisariatin numër 5 në kryeqytet.
Sipas të dhënave, vajzat janë larguar nga banesat respektive pa lënë asnjë gjurmë. Nuk dihet ende fakti pse zhdukja e tyre është denoncuar me vonesë nga familjarët.
Denoncimet për vajzat
Javanews.al ka mësuar se dy ditë më parë, në Komisariatin numër 5 kanë mbërritur dy nëna për denoncimin e zhdukjes së vajzave të tyre.
Denoncimi i parë është bërë në orën 11, në datën 22 shkurt ku është paraqitur shtetasja 41-vjeçare L.Q. Ajo u ka thënë oficerëve të policisë se ka humbur kontaktet me vajzën e saj 20-vjeçare me inicialet R.Q. në muajin nëntor të vitit 2015. Sipas dëshmisë, vajza u largua nga banesa në fshatin Zall-Herr dhe nuk u kthye më kurrë. Ajo nuk ka pasur asnjë informacion për vendndodhjen e saj prej asaj kohe.
Denoncimi i dytë është bërë nga një tjetër nënë, 46-vjeçarja me inicialet H.J. Edhe zhdukja e vajzës së saj, 20-vjeçares me inicialet S.J. ka ndodhur pasi është larguar nga banesa e tyre në fshatin Valias. Kjo ngjarje ka ndodhur në datën 26 prill të vitit të shkuar.
Pistat e Hetimit
Pas denoncimit të rasteve, Policia e Tiranës ka referuar materialet në Prokurori dhe së bashku me këtë organ po punohet për zbulimin e vendndodhjes së tyre. Rastet kanë ngritur një sërë dyshimesh për policinë, e cila ka përqendruar veprimet në disa pista. Bazuar në të dhënat e siguruara deri tani dhe dëshmitë e familjarëve, dyshohet se vajzat mund të jenë larguar me dëshirë nga banesat e tyre. Kjo lidhet edhe me faktin se denoncimi për zhdukjen e tyre u bë muaj më vonë nga humbja e kontaktit. Por, pavarësishit këtyre dyshimeve, mendohet se ato janë ndihmuar nga dikush për t’u strehuar apo për t’u larguar jashtë Shqipërisë. Për momentin nuk dihet nëse vajzat ndodhen në Shqipëri apo tashmë kanë kaluar kufirin. Koha e gjatë e zhdukjes së tyre shton dyshimet se ato mund të jenë larguar jashtë shtetit duke shkelur kufirin në mënyrë të jashtëligjshme.
Ndërkohë, nuk përjashtohet mundësia edhe e rrëmbimit të tyre nga grupe krimnale që operojnë në zonën periferike të kryeqytetit, me qëllim shfrytëzimin për prostitucion. Këto dyshime bazohen me faktin se pavarësisht periudhës së ndryshme, rrethanat e largimit të tyre nga banesat janë të njëjta./Javanews.al
