Mesa duket Opozita nuk do të dorëhiqet nga kërkesa e saj për Testin e Drogës, në ligjin për procesin e Dekriminalizimit. Ditën e djeshme, pas mbledhjes së grupit në PS, Ministrja e Shtetit për Marëdhëniet me Parlamentin Ermonela Felaj tha se praktikisht opozita e mazhoranca nuk kishin asnjë pengesë për të finalizuar ligjin për Dekriminalizimin.
Por kryetari i komisionit të posaçëm për këtë çështje, deputeti demokrat Oerd Bylykbashi tha se opozita nuk është tërhequr nga testi i drogës.
“Askush nuk ka tagër nga aspekti i PD-së që të tërhiqet nga testi i drogës. Është pjesë e një platforme politike të miratuar nga PD-ja në lidhje me çështjet e dekriminalizimit. Ju konfirmojë që PD nuk është tërhequr nga kjo çështje. Nëse do të kishte pasur marrëveshje sot do ta kishim komisionin të mbledhur, do të ishim në fazën e aprovimit. Ne nuk kemi ndërmend që nëpërmjet detajesh ligjore t’i japim mundësinë kriminelëve të ndryshëm të kategorive të ndryshme që të fshihen dhë të gjejnë alibinë për t’u futur përsëri në organet e shtetit qoftë të zgjedhura dhe të emëruara”, ka thënë Bylykbashi.
Komisioni i posaçëm parlamentar për dekriminalizimin e mbyll mandatin e tij në fund të dhjetorit, ndërsa palët politike kanë gjetur dakortësinë pothuajse për të gjithë projektin.