Dekriminalizimi, Balla: Këtë proces duam ta bëjmë bashkë
Deputeti i Partisë Socialiste, Taulant Balla ka shprehur sot bindjen se mazhoranca dhe opozita do t’i tejkalojnë kundërshtimet sa i takon pr/ligjit të dekriminalizmit, duke dalë me një tekst të përbashkët e të gjithëpranuar që mund të votohet me konsensus në kuvend.
Duke folur për mediat jashtë ambienteve të kuvendit, në një linjë me qëndrimin e mbajtur më herët nga kreu i grupit parlamentar të LSI, Petrit Vasili, Balla ritheksoi faktin se dallimet mes dy drafteve, atij të propozuar nga mazhoranca dhe atij të propozuar nga opozita janë mjaft të vogla, ndërsa iu shpreh optimist se përmes diskutimeve në komisionin e posaçëm këto dallime do të tejkalohen.
“Ka shumë çështje që na bashkojnë. Ka disa gjëra që na ndajnë por përsëri mendoj se janë thjesht artifica që nuk prekin thelbin e pr/ligjit.
Kam bindjen që në komunikimin e rivendosur do të arrijmë që përmes komisionit të posaçëm dhe mekanizmave të tjerë parlamentar të mundësojmë që të kemi një pr/ligj të përbashkët. Procesi ka dy hapa: Ndryshimet kushtetuese, që janë disa çelësa të cilët duhet hapur në kushtetutë në mënyrë që ligji të hyjë në fuqi.
Në këtë fazë nuk besoj se kemi dallime të mëdha, janë të teknikës ligjore, p.sh., ata mendojnë se duhen ndryshuar më shumë nene ne mendojmë se duhen më pak. Faza e dytë ka të bëjë me të dy projektligjet ai i qeverisë dhe i opozitës. Jemi në proces komunikimi, shumë shpejt do të bëjmë të mundur gjetjen e një teksti të përbashkët dhe votimin në kuvend. Por e kam thënë edhe më parë, se nëse PD vjen me propozime alla shqiptarçe, që në thelb nuk ndryshojnë asgjë, vetëm sa e bëjnë qesharak procesin”, tha Balla.
