Inaugurohet çerdhja në Bregun e Lumit, Veliaj: Vëmendje edhe në periferi të Tiranës
Nga dita e sotme, vogëlushët e zonës së Bregut të Lumit kanë një çerdhe të rikonstruktuar. Kryetari i Bashkisë së Tiranës, Erion Veliaj, ishte sot i pranishëm në çerdhen “Zërat e Jetës”, ku mori pjesë në inaugurimin e rikonstruksionit të kësaj godine me mbështetjen e një banke private, e cila u bë pjesë e nismës “Adopto një çerdhe”.
“Fakti që sot ‘Zërat e Jetës’ është një ndër çerdhet më model të Tiranës, pikërisht zonën e Bregut të Lumit, në një nga lagjet më të varfra dhe me kushtet ekonomike më të vështira, është tregues se kemi të njëjtën vëmendje si për qendrën e Tiranës, ashtu edhe në periferi, për t’u siguruar që çdo qytetar i Tiranës merr të njëjtat shërbime”, deklaroi Veliaj. Çerdhja “Zërat e Jetës” është pjesë e projektit të nisur nga Bashkia e Tiranës pak kohë më parë për adoptimin e çerdheve, për të cilat u kërkua ndihma e bizneseve për t’i kthyer në funksionalitet të plotë.
Duke e konsideruar nismën “Adopto 1 çerdhe” si të suksesshme, kryetari i Bashkisë së Tiranës ka preferuar të shikojë nga afër se çfarë është bërë nga donatorët, të cilët kanë raportuar të përfunduar godinat e marra në patronazh. “Më rezulton që gjithçka që është raportuar nga donatori përputhet në mënyrë të përsosur me atë që pashë me sytë e mi. Më vjen mirë që ofrojmë shërbim fantastik, cilësor, ndoshta edhe më të mirë se shumë çerdhe në ish Bllok ose brenda Unazës së Tiranës”, përfundoi Veliaj.
