Telenovela e dekretimit të ministrit të brendshëm është rikthyer nga e para. Rama ka dërguar të premten edhe një herë nga e para në Presidëncë, emrin e Sandër Lleshit për postin e ministrit të brendshëm. Meta duket se i ka paraprirë zarfit të kryeministrit, duke deklaruar se “diletantët duhet të lexojnë Kushtetutën”. Një përgjigje paraprake negative për shpresat e Ramës dhe të shumicës, për të pasur një reagim të dytë pozitiv nga kreu i shtetit për Lleshin pas shtatë ditësh.
Java e shkuar ka parë përplasjen e parë të fortë publike mes Metës dhe Ramës për dekretin në fjalë. Pasi dogji afatin kushtetues për dekretimin e Lleshit, Ilir Meta bëri publik emrin e kandidaturës për kreun e KLSH, të cilën ja ka përcjellë zyrtarisht Kuvendit. Anëtarja e Gjykatës Kushtetuese Vitore Tusha është e përzgjedhura e presidentit, por vështirë se do të jetë e tillë edhe për Edi Ramën. I cili deklaroi në Real Story të enjten se nuk kishte asgjë kundër emrit në fjalë, porse nuk mund të lejonte të prekej mbarëvajtja e reformës në drejtësi. “Zonja Vitore Tusha së pari njëherë gëzon të gjithë respektin tim. Ajo është një zonjë që ka qenë për vite të tëra në këtë detyrë. Ajo gëzon respektin tim të plotë si gjykatëse sepse ka kaluar Vetingun. Unë nuk di historitë e të kaluarës me Nanon, por di që në vendimmarrje ne do të diskutojmë një fakt tjetër. Do të diskutojmë që emërimi zonjës si kryetare e Kontrollit të Lartë të Shtetit mund të vërë në pikëpyetje reformën në drejtësi.
Sepse bëhet fjalë për Këshillin e Emërimeve në Drejtësi dhe zonja është anëtare e Gjykatës Kushtetuese aktualisht bashkë me kryetarin e Gjykatës dhe janë kyç për Këshillin e Emërimeve në Drejtësi.Duke qenë se zonja ka dalë e pastër nga Vetingu dhe mund të jetë potencial për KED”, tha Rama.
E gjitha kjo tingëllon tashmë si një kundërvënie mes presidentit dhe kryeministrit, jo edhe aq për emrin e ministrit të brendshëm, pasi Lleshi tashmë është ulur në atë poltron, por më shumë rreth kandidaturës së kreut të KLSH. Një pozicion i cili mund të jetë shumë delikat në të ardhmen, kur raportet kritike të këtij institucioni të nisin të shihen eventualisht si prova kundër zyrtarëve të lartë të maxhorancës, pasi drejtësia e re të nisë nga funksioni megjithë organizmat e saj të luftës ndaj korrupsionit.
Duket mbajtur peng Lleshin, Meta po kërkon de facto një kompromis për emrin e Vitore Tushës, një person i cili shihet si shumë i afërt me Presidentin.
A.Rada
