Pavarësisht se projekt ligji për Lojërat e Fatit u miratua me votat e mazhorancës, nuk ka kaluar pa debate momenti para votimit, në seancën e fundit parlamentare për vitin 2015.
Deputeti demokrat, ish ministri finacave Ridvan Bode, ka akuzuar kreun e komisionit të ekonomisë, socialistin Erjon Braçe, se ky i fundit është i lidhur me klientelën që përfiton nga drafti në fjalë.
Sipas Bodes, në ndryshimet e parashikuara në pr.ligj thuhet se për liçensimin e një biznesi të tillë fatura është 10 milionë dollarë, por ndryshe është fatura për ato resorte kazinosh, të cilat do ta kenë koston e liçensimit 500 mijë dollarë.
“Personi që sapo foli është pikërisht pjesë e klientelës. Por thelbi i ligjit ishte kjo e fundit, resortet e kazinove. Dhe ne i kërkuam që të vendosë parlamenti që të jenë të balancuara dhe jo t’i vendosë qeveria. Megjithatë qeveria erdhi dhe hodhi shashkën e më pas iku. Një kazino e ka liçensën 10 milion dollarë, një resort kazinoje do ta ketë 500 mijë dollarë. Kjo është diçitura.”- tha Bode.
Pas kësaj ka reaguar Erjon Braçe i cili ka theksuar se ai nuk mund të jetë pjesë e klientelës, për shkak se nuk mer vesh nga lojërat e fatit apo bixhozi. Në të kundërt, tha Braçe, në krahun e opozitës, ai është në dijeni të personave që jo vetëm luajnë bixhoz, por janë pjesë e shitjes së ndeshjeve.
“Unë mirëpres nga zotëria që foli këtu çdo lloj epiteti apo sharje, madje çdo lloj etiketimi. Por që ky mua të më bëjë klient të lojërave të fatit, kjo është e tepërt. Edhe ai vetë, e pa në komision, që unë nuk marr vesh nga ajo lloj pune. A po, unë e di që nga ajo ana,( duke e patur për krahun e opozitës) ka njerëz që i luajnë lojërat e fatit aq mirë sa nuk ka ku të shkojë. Në qoftë se do zotëria, unë mund t;i theme edhe me emra. Që nuk meren vetëm me lojërat e fatit, por edhe me menaxhimin e ndeshjeve. Që ta mbyllim këtu këtë histori dhe të mos hyj këtu tek Federbet-i, sepse bëhet me turp gjithë dynjaja pastaj.”- ka thënë Braçe.
