Europa po përballet me një ndryshim dramatik të motit, ndërsa pas një periudhe të pazakontë të ftohti arktik, meteorologët paralajmërojnë ardhjen e një vale të fortë të nxehti në shumë vende të kontinentit.
Sipas analizës së publikuar nga The Guardian, temperaturat në disa zona të Europës kanë qenë deri në 10-15 gradë Celsius nën normalen sezonale gjatë javëve të fundit, si pasojë e masave të ajrit të ftohtë që zbritën nga Arktiku drejt jugut.
I ftohti i pazakontë solli ngrica të forta dhe stuhi në disa shtete europiane, duke shkaktuar dëme në bujqësi, veçanërisht në France, ku fermerët ndezën zjarre nëpër vreshta për të mbrojtur prodhimin nga ngricat e pranverës.
Mot i paqëndrueshëm u regjistrua edhe në pjesë të tjera të kontinentit, me rreth 750 mijë goditje rrufesh dhe stuhi të forta që prekën rajone të ndryshme europiane. Në Serbi autoritetet shpallën alarme të kuqe për shkak të motit ekstrem.
Megjithatë, meteorologët paralajmërojnë se situata pritet të ndryshojë shpejt. Një sistem i fuqishëm presioni të lartë po formohet mbi Europën Perëndimore dhe pritet të sjellë masa ajri shumë të nxehta nga Afrika e Veriut.
Si pasojë, temperaturat mund të rriten deri në 15 gradë Celsius brenda pak ditësh. Në Spanjë dhe Portugali temperaturat pritet të arrijnë 30 gradë Celsius, duke krijuar kushtet për valën e parë të fortë të të nxehtit këtë sezon.
Edhe Mbretëria e Bashkuar pritet të përjetojë rritje të ndjeshme temperaturash. Sipas raportimeve, disa zona të Anglisë mund të jenë më të nxehta se Athina gjatë fundjavës së ardhshme.
Ndërkohë në SHBA po regjistrohen gjithashtu kontraste ekstreme të motit. Në veriperëndim priten stuhi dëbore të pazakonta për muajin maj, ndërsa jugperëndimi amerikan përballet me rrezik të lartë zjarresh për shkak të temperaturave të larta dhe erërave të forta.
Ekspertët e klimës paralajmërojnë se këto luhatje të forta të motit janë pjesë e një modeli gjithnjë e më ekstrem klimatik, ku periudhat e të ftohtit intensiv dhe valët e të nxehtit po alternohen me shpejtësi në shumë rajone të botës.
