Autoritetet lokale në New York kanë vendosur të rrisin çmimet e biletave të trenit nga 12 në 150 dollarë për ndeshjet e Botërorit. Ky vendim është dënuar ashpër nga FIFA. Ndërkohë, Gianni Infantino ka konfirmuar se në pushimin mes pjesëve të finales do të ketë shfaqje si në Superbowl.
Rritja e çmimit të biletave të trenit në New York nga 12 në 150 dollarë gjatë Botërorit, për tifozët që do të shkojnë në stadiumin “Met Life”, ka shkaktuar polemika të shumta.
Këtë fundjavë, autoritetet në New Jersey vendosën kushte për tifozët që duhet të udhëtojnë nga qendra e qytetit drejt stadiumit, një distancë afro 30 kilometra, duke paguar 150 dollarë për biletën e trenit dhe 80 dollarë për atë të autobusit.
FIFA thotë se kjo gjë do të dekurajojë tifozët që të marrin pjesë dhe se të ardhurat që kjo organizatë do të gjenerojë nga Botërori do të shpërndahen për skuadrat dhe nuk janë fitime, ashtu siç u deklarua nga drejtuesit e shërbimit publik.
Kjo nuk është polemika e vetme kur kanë mbetur më pak se dy muaj nga Botërori. Presidenti i FIFA-s, Gianni Infantino, ka konfirmuar se në pushimin mes pjesëve të finales së këtij eventi do të ketë një shfaqje për tifozët, ashtu si në Superbowl. Diçka që nuk është mirëpritur nga Shoqata e Futbollistëve, pasi qëndrimi më shumë se 15 minuta në dhomat e zhveshjes do të ulë ritmin e lojtarëve.
