Tirana po fiton gjithnjë e më shumë vëmendje ndërkombëtare si një prej destinacioneve urbane evropiane në zhvillim.
Rritja e turizmit, bumi i ndërtimeve, jeta kulturore dhe ndërthurja e historisë me arkitekturën moderne janë në qendër të një artikulli të publikuar nga gazetari Chris Dorrell në median britanike “City AM”.
“Tirana është një ndërthurje mes Mumbait dhe Las Vegasit”, i tha një vizitor autorit para udhëtimit të tij në kryeqytetin shqiptar.
Për gazetarin, kjo përshkrim lidhet me ritmin e shpejtë të transformimit të qytetit, i cili përshkruhet si dinamik, energjik dhe disi kaotik, me një zhvillim urban që po ndryshon pamjen e kryeqytetit.
Tirana, e cila deri në vitet ’90 konsiderohej ndër kryeqytetet më të varfra të Evropës, po përjeton një bum të madh ndërtimi. Sipas artikullit, rreth 30 rrokaqiej janë planifikuar, ndërsa disa prej tyre tashmë kanë përfunduar ose janë në ndërtim.
Turizmi në rritje
Një nga faktorët kryesorë të këtij transformimi është rritja e turizmit.
Sipas të dhënave të cituara në artikull, gjatë vitit 2025 Shqipëria regjistroi 12.5 milionë vizitorë që qëndruan të paktën një natë, më shumë se dyfishi i shifrës së regjistruar para pandemisë, kur ishin rreth 6.1 milionë.
Dy dekada më parë, numri ishte rreth 3.3 milionë vizitorë.
Autori vëren se ritmi i zhvillimit është aq i shpejtë, sa një vizitë në Tiranë pas pesë vitesh mund të zbulojë një qytet dukshëm të transformuar.
Sheshi Skënderbej dhe rrokaqiejt
Në zemër të kryeqytetit ndodhet Sheshi Skënderbej, i cili përshkruhet si qendra e jetës urbane të Tiranës.
Përreth tij ndodhen institucione të rëndësishme kulturore, ndërsa panorama e qytetit dominohet gjithnjë e më shumë nga ndërtesat e larta.
Mes tyre përmenden kulla 31-katëshe “Eyes of Tirana”, me arkitekturën e saj karakteristike, si dhe “Downtown One”, një ndërtesë 40-katëshe në fasadën e së cilës është vendosur një hartë tredimensionale e Shqipërisë.
Nga e kaluara komuniste te Tirana moderne
Artikulli nuk ndalet vetëm te zhvillimi modern. Autori e sheh vizitën në Tiranë edhe si një mundësi për të kuptuar historinë e trazuar të Shqipërisë.
Ndër vendet kryesore të vizituara janë “Shtëpia me Gjethe”, muzeu kushtuar historisë së Sigurimit të Shtetit, si dhe Bunk’Art, një prej bunkerëve të periudhës komuniste të kthyer në hapësirë muzeale.
Këto vende, sipas artikullit, ofrojnë një tjetër dimension të Tiranës, duke treguar kontrastin mes së kaluarës së izoluar dhe qytetit modern që po zhvillohet me ritme të shpejta.
Blloku, nga zona e elitës komuniste në qendrën e jetës së natës
Një tjetër ndalesë është zona e Bllokut, e cila gjatë komunizmit ishte e rezervuar për drejtuesit më të lartë të regjimit, ndërsa sot është një nga zonat më të frekuentuara të kryeqytetit, me kafene, bare dhe restorante.
Autori përmend edhe “Radio Bar”, një ambient me dekor retro, si një prej vendeve ku vizitorët mund të provojnë rakinë, të cilën e përshkruan si një prej pijeve tradicionale të Shqipërisë.
Në përfundim, artikulli e paraqet Tiranën si një qytet në transformim të vazhdueshëm, ku rrokaqiejt, turizmi, historia komuniste dhe jeta urbane bashkëjetojnë në një kryeqytet që po kërkon gjithnjë e më shumë vend në hartën turistike evropiane.
