Sonte në mbrëmje starton Champions League me ndeshjet e grupeve A,B,C dhe D. Dueli që spikat është ai i grupit D mes Barcelonës dhe Juventusit që do të luhet në “Camp Nou”. Katalanasit duan të hakmerren për eliminimin në çerekfinalet e sezonit të kaluar.
Megjithëse nuk ka qënë në stolin e Barcës për trajnerin Ernesto Valverde ai eliminim ende djeg mes futbollistëve. Në konferencë Valverde sqaron:”Barca-Juve do të jetë një ndeshje stimuluese, Dybala është një lojtar i madh, por Juvja ka edhe lojtarë të tjerë mjaft të mire”.
Bardhezinjtë kanë shumë mungesa këtë mbrëmje duke nisur me Chiellinin e Mandzukic, Cuadrado i pezulluar dhe të padisponueshëm po ashtu edhe Khedira,Marchisio dhe Hevedes. Trajneri i Juventusit Allegri do të eci hap pas hapi dhe thotë se objektivi i parë është kalimi i grupit ndërsa Dybala i thur elozhe katalanasve duke thënë se Barca është maksimumi ndërsa për të pika referimi janë Messi dhe Ronaldo. Ndeshja tjetër e grupit është ajo mes Olympiacos dhe Sportingut të Lisbonës që luhet në Pire.
Në grupin C ka një tjetër duel interesant mbrëmjen e sotme që luhet në Olimpico. Roma pret Atletico Madrid. Simeone është i bindur se skuadra e tij herët a vonë do ta fitojë Championsin. Ndërsa kapiteni i Kombëtares Ansi Agolli dhe skuadra e tij Qarabag debutojnë në “Stamford Bridge” ndaj Chelseat. Në grupin B, Bayerni pret Anderlehtin ndërsa PSG luan në transfertë në Skoci ndaj Celtic. Manchester United-Basel dhe CSKA e Moskës-Benfica janë dy ndeshjet e grupit A.
ma.me
