Trupi i cili u gjet i murosur në apartamentin në Torremolinos të Spanjës më 6 Qershor, është i Sibora Gaganit. Ajo që dyshohej, fatkeqësisht tashmë është konfirmuar nga testi i ADN-së. Lajmi bëhet i ditur nga mediat italiane, por edhe ato spanjolle. 22-vjeçarja italo-shqiptare u zhduk 9 vjet më parë, në Korrik të 2014-s, pikërisht në Spanjë, aty ku kishte shkuar për të jetuar më të dashurin italian, Marco Romeo.
Ky i fundit u arrestua më 17 Maj për vrasjen e partneres aktuale Paula, një 28-vjeçarje spanjolle e cila u vra me 14 goditje me thikë nga 45-vjeçari. Ai pranoi po ashtu vrasjen e Siborës, dëshmi nga e cila u tërhoq, e më vonë para gjykatës tha se ishte i pafajshëm.
Megjithatë dëshmia e tij spontante teksa shoqërohej për vrasjen e Paulas, bëri që të rihapej çështja e Siborës. Kontrollet në shtëpinë ku kishin jetuar zbuluan një kuti prej druri në mur, brenda së cilës gjendej trupi i Siborës. Ajo u vra me 4 goditje thike pas shpine. Marco më pas e futi në kuti dhe e murosi, duke pretenduar se ajo e kishte braktisur dhe ishte larguar.
Nëna e Siborës, Elisabeta Shahini nuk i humbi kurrë shpresat për të mësuar fatin e së bijës. Pak ditë pas zbulimit të trupit, për mediat italiane nëna e saj tha: “Si fillim dua të kthej vajzën time në shtëpi, e më pas dua që të bëhet drejtësi”.
