Ministrja e Integrimit, Klajda Gjosha deklaroi se kushti i vetëm për hapjen e negociatave me BE është zhbllokimi i Vettingut. Deklarata e saj vjen në një konfenrencë për shtyp pas takimit me kancelaren Merkel, e cila sipas Gjoshës shprehu mbështetjen e Gjermanisë.
Kancelarja Angela Merkel mbështet integrimin e vendit tonë në BE dhe vlerëson reformat e ndërmarra nga qeveria për të realizuar 5 prioritetet për çeljen e negociatave.
Sipas Gjoshës, në këtë pikë ku ndodhet vendi, integrimi varet nga zhbllokimi i ligjit të Vettingut.
“Zgjedhjet e ardhshme janë kriter por jo kusht i vendosur nga KE për çeljen e negociatave”, tha Gjosha, duke shtuar se qeveria është e gatshme të dialogojë në çdo moment me opozitën për zhbllokimin e ligjit të Vettingut.
Referuar vizitës në Gjermani, Gjosha tha se kjo vizitë ishte tejet pozitive dhe siguroi se në këtë takim Merkel kishte dhënë mbështetjen e qartë për integrimin ku vettingu është kushti për çeljen e negociatave.
“Nuk mund të jap detaje të hollësishme nga bashkëbisedimi për afro një orë ku kam qenë e pranishme së bashku me kolegun Bushatin, por ju siguroj se kemi konstatuar mbështetjen e qartë të Merkelit.
Vlerësimi që Merkel i bëri reformave ishte pozitiv dhe ndamë një mendje që procesi të jetë pa surpriza. Gjithçka varet nga ecuria e vettingut dhe sa më shpejt të nisë zbatimi aq më parë mund të çelen negociatat. Kjo është konfirmuar dhe në takimin me kryeparlamentarin e Bundestagut gjerman.
Nuk jemi në fazën e vendimmarrjes së parlamentit. As nuk duhet të habitemi as të abuzojmë me qëndrimet e deputetëve. Për ta është një proces i natyrshëm politik. Prandaj ne duhet të fokusohemi në procesin tonë”, tha Gjosha./a.m.
