Nga marrëveshja e 19 prillit të vitit 2013, e cila si qëllim kishte normalizimin e marrëdhënieve mes Kosovës dhe Serbisë më së shumti ka përfituar Serbia, referuar Zërit.
Ndërkohë që Kosova zakonisht e ka ndjekur axhendën e Serbisë dhe nuk ka arritur asnjëherë që të vë kushte, e aq më pak të pengojë ndonjë marrëveshje, për arsye parimore ose reciprociteti.
Kështu mendon analisti politik Imer Mushkolaj dhe Zgjim Hyseni nga Vetëvendosja në ditën kur janë bërë tri vjet nga nënshkrimi i marrëveshjes së parë mes Kosovës dhe shtetit fqinj, Serbisë.
Marrëveshja e 19 prillit, ndër të tjera përmban pika që flasin për Asociacionin e Komunave me shumicë Serbe dhe shpërbërjen e strukturave paralele në veri. Por tre vjet pas nënshkrimit të kësaj marrëveshje, nuk mund të thuhet se ka zbatim.
Më 19 prill të vitit 2013 Kosova dhe Serbia kanë nënshkruar marrëveshjen e parë për normalizimin e marrëdhënieve.
Dokumenti është nënshkruar nga kryeministrat e atëhershëm të Kosovës dhe Serbisë, Hashim Thaçi dhe Ivica Daçiç, me ndërmjetësimin e Bashkimit Evropian.
