Nga Aranit Muraçi
Florian Binaj, komediani që u bë i njohur për imitimet e tij të shumta ndaj kryeministrit Edi Rama, shpalli këto ditë kandidaturën për kryebashkiak të Tiranës duke siguruar mbështetjen e partisë kryesore të opozitës. Por pa e nisur mirë garën e tij më të rëndësishme politike, në vend të një krahasimi më të arsyeshëm dhe lokal, ai po interprertohet dhe po ngatërrohet përmes një krahasimi të rangut ‘global’ me presidentin ukrainas, Volodymyr Zelenskyy.
Çfarë e bashkon në të vërtetë kandidatin e PD-së për bashkinë e Tiranës Florian Binaj me presidentin ukrainas, Volodymyr Zelenskyy dhe çfarë e dallon atë me dy kolegët e tij komedianë, Julian Deda dhe Erion Isai, të cilët i janë futur më herët udhëtimit politik?
Florian Binaj u përfshi në protestat e thirrura gjoja nga shoqëria civile të vitit 2023, mbajti fjalime të shumta dhe ndryshe nga Zelenskyy që fitoi popullaritet me një fjalim të vetëm politik, ai dy vite më parë dështoi politikisht bashkë me protestat. Dështimi i parë politik pas 2023, pavarësisht ‘civilitetit’, ia zbehu deri diku edhe karrierën si komedian.
Për të mos shkuar deri në Kiev, në koridoret e ngushta të politikës shqiptare spikasin aktualisht dy komedianë me të cilët Florian Binaj mund të krahasohet shumë herë më mirë se sa me presidentin e Ukrainës.
Të dy kanë dalë nga e njëjta “fabrikë”.
Njëri madje e ka fituar garën për kryetar bashkie, më herët se ai. Është fjala për Erion Isain, i cili përveç se ishte një kandidaturë e partisë në pushtet dhe me shanse më të mëdha se kundërshtarët për të fituar pati fatin tjetër sepse fitoi në vitin 2019 një garë pa rivalë. Në të njëjtin vit me Zelenskyy. Të dy janë në të njëjtën detyrë edhe sot, veç të tjerave Zelenskyy në betejë me rusët dhe Isai me SPAK.
Komediani tjetër nga PD është Julian Deda. Aktori demokrat ishte i projektuar prej kohësh si një kandidat i mundshëm për të imituar Zelenskyy. Por Julian Deda u dogj si kandidaturë e mundshme për kryetar bashkie në 2023 dhe për deputet në zgjedhjet e fundit nga strukturat e PD, me motivacionin, siç e pranoi së fundmi ai vetë dhe siç u shpreh se i kishin thënë; që politika është gjë aq serioze saqë bie ndesh me ‘profesionin e një komediani’. Për këtë arsye Deda shprehu një farë zemërimi dhe zhgënjimi me kandidaturën e Binaj.
Kështu në përpjekje për të imituar komedianët globalë të cilët shënuan sukses në udhëtimin e tyre politik, kandidati për kryetar bashkie i Tiranës i mbështetur nga PD po humbet ende pa nisur garën përkrahjen e komedianëve shqiptarë brenda partisë së vet. Si dhe të kandidatëve politikë, të cilët janë investuar prej vitesh për një besim të tillë.
Për krahasimin me Zelenskyy duhet njohur para së gjithash udhëtimi politik i Presidentit aktual të Ukrainës që, në të vërtrtë, nisi përmes artit dhe frymëzoi shumë komedianë të tjerë anembanë botës.
Volodymyr Zelenskyy (lindur më 25 janar 1978) ishte një komedian në vendin e tij para se të zgjidhej që nga viti 2019 presidenti i gjashtë i Ukrainës.
Ironikisht, roli më i famshëm i Zelensky-t si aktor komik ishte interpretimi i një mësuesi i cili u katapultua në presidencë në serialin televiziv, “Shërbëtori i Popullit”.
Ishin të shumtë ata të cilët kandidaturën e tij, në moshën 41 vjeç, fillimisht u panë si shaka – madje edhe partia e tij politike që ai themeloi mori emrin “Shërbëtori i Popullit”.
Zelensky e nisi karrierën politike nga hiçi, u bë popullor në vitin 2018 me një fjalim të vetëm, dhe suksesi e nxiti të futej në garën presidenciale si një kandidat i pavarur, i fitoi zgjedhjet me 73.23 përqind të votave në raundin e dytë, duke mposhtur Poroshenkon në fitoren më të madhe e bindëse në historinë e zgjedhjeve presidenciale ukrainase.
Skeptikët kishin frikë se Zelensky do të rezultonte të ishte një udhëheqës kukull, i kontrolluar jo nga partitë politike por nga oligarku Ihor Kolomoisky, i cili mbështeti fushatën e tij dhe kishte qenë nën hetim për mashtrim dhe pastrim parash.
Por Zelensky doli të ishte më i pavarur nga sa mendonin ata që e shihnin me skepticizëm, ndërsa fushata antikorrupsion e administratës së tij pati një farë suksesi gjatë viteve të qeverisjes para se vendi i tij të përfshihej në luftë.
Lidershipi i Zelensky është i njohur ndërkombëtarisht. Në Mynih, në shkurt të vitit 2022, Zelensky nxori në pah kërcënimin me të cilin po përballej vendi i tij dhe akuzoi Perëndimin se po e kalonte me qetësi një Rusi të ringjallur.
Asnjë udhëheqës ukrainas nuk i kishte folur kaq drejtpërdrejt Perëndimit më parë.
Tre vite pas luftës, Donald Trump në përpjekjet e tij për të arritur paqen, e quajti atë ‘diktator’ ndërsa përplasja në Shtëpinë e Bardhë me presidentin amerikan i dha Zelensky në sytë e mbarë botës tiparet e një udhëheqësi unikal.
Një sondazh i kohëve të fundit zbuloi se Zelensky gëzon ende mbështetjen e 57% të ukrainasve.
Lufta e Rusisë kundër Ukrainës ka zgjatur shumë më tepër sesa kishte ndërmend Moska – Putin mendonin se se do ta merrte Ukrainën brenda pak ditësh nga nisja e asaj që ai e quajti “operacion special ushtarak”.
Gjashtë vite në pushtet, më tepër se tre në luftë, dhe ndërsa e ardhmja e Ukrainës është ende e pasigurt, Zelensky mbetet një politikan sfidues në arenën ndërkombëtare përballë agresionit rus.
Natyrshëm që Zelensky frymëzon sot komedianë të shumtë anembanë botës, sikurse është po aq normale për të tjerë që të bëjnë sa më tepër përpjekje dhe të imitojnë sadopak modelin e tij në politikë.
