Autoritetet shëndetësore në disa vende të Azisë kanë rritur nivelin e gatishmërisë, pas konfirmimit të një shpërthimi të virusit Nipah në shtetin indian të Bengalit Perëndimor.
Virusi, i cili nuk ka as kurë dhe as vaksinë, ka një shkallë vdekshmërie prej 40-70 për qind.
Ministria e Shëndetësisë e Indisë konfirmoi dy raste, ndërsa rreth 200 persona që kanë pasur kontakte të afërta janë monitoruar dhe testuar. Deri tani nuk janë raportuar raste jashtë Indisë.
Si pasojë e situatës, Tajlanda ka vendosur kontrolle shëndetësore për udhëtarët që vijnë nga Bengalin Perëndimor, ndërsa Tajvani ka njoftuar se do ta klasifikojë virusin Nipah si kërcënim të nivelit më të lartë shëndetësor.
Çfarë është virusi Nipah?
Nipah është një virus zoonotik, që transmetohet nga kafshët te njerëzit, kryesisht nga lakuriqët e natës të llojit “fruit bats” dhe derrat.
Pasi kalon te njerëzit, virusi mund të përhapet edhe nga personi te personi përmes kontaktit të ngushtë.
Sa i rrezikshëm është?
Virusi u identifikua për herë të parë në Malajzi në vitin 1999.
Shpërthimi aktual është i pari në Bengalin Perëndimor që nga viti 2007, çka sipas ekspertëve ngre shqetësime për mbikëqyrjen epidemiologjike.
Sëmundja nis disa ditë pas infektimit me simptoma si temperaturë, dhimbje koke, kollë, dhimbje muskujsh dhe vështirësi në frymëmarrje.
Në fazat e avancuara, virusi mund të shkaktojë ënjtje të trurit (encefalit), e cila shpesh është fatale. Të mbijetuarit mund të përballen me pasoja afatgjata neurologjike.
Trajtimi dhe parandalimi
Sipas CDC-së dhe OBSH-së, nuk ka trajtim specifik apo vaksinë për virusin Nipah.
Trajtimi kufizohet në kujdes mbështetës intensiv. OBSH e ka renditur Nipah si një nga patogjenët prioritarë që kërkon urgjentisht kërkim shkencor.
Ekspertët theksojnë se parandalimi është mënyra kryesore e mbrojtjes, duke shmangur kontaktin me kafshët e infektuara, duke zier lëngun e palmës para konsumit dhe duke forcuar kontrollin shëndetësor dhe monitorimin epidemiologjik në zonat e rrezikuara.
