Reshjet e dendura të shiut dhe rreziku i përmbytjeve kanë vënë në gatishmëri disa zona të Italisë. Autoritetet kanë shpallur alarm portokalli për motin e keq, ndërsa në disa qytete janë marrë masa emergjente, përfshirë mbylljen e shkollave, parqeve dhe ambienteve publike.
Departamenti i Mbrojtjes Civile, në bashkëpunim me autoritetet rajonale, ka lëshuar një paralajmërim të ri për përkeqësimin e kushteve atmosferike, duke kërkuar gatishmëri të shtuar në zonat e prekura.
Ndërkohë, niveli i alarmit të verdhë është në fuqi në rajonet e Kalabrisë, Kampanias, Molises, Abrucos dhe Siçilisë, raporton agjencia italiane e lajmeve ADN Kronos.
Për shkak të reshjeve intensive të parashikuara, disa bashki në rajonin e Pulias kanë vendosur të marrin masa parandaluese për të garantuar sigurinë e qytetarëve.
Shkollat janë mbyllur në disa qytete, përfshirë San Severon, në provincën e Foggias, si dhe në Leçe dhe Brindisi.
Në Barleta, autoritetet kanë njoftuar se rrugët kryesore, ato periferike dhe nënkalimet do të monitorohen vazhdimisht për shkak të rrezikut të përmbytjeve. Në rast se situata përkeqësohet, këto segmente do të mbyllen për qarkullimin e automjeteve dhe këmbësorëve.
Ndërkohë, Bashkia e Leçes ka urdhëruar mbylljen e varrezave komunale, selisë së bashkisë dhe parqeve publike gjatë periudhës së alarmit. Gjithashtu, është pezulluar aktiviteti i disa tregjeve.
Autoritetet u kanë bërë thirrje banorëve të tregojnë kujdes të shtuar dhe të shmangin lëvizjet e panevojshme gjatë kushteve të pafavorshme atmosferike.
Qytetarëve u rekomandohet të shmangin parqet dhe zonat me pemë, të mos kalojnë nëpër nënkalime të përmbytura dhe të tregojnë kujdes të veçantë gjatë stuhive.
Situata meteorologjike po ndiqet nga afër nga autoritetet, të cilat kanë paralajmëruar se masat kufizuese mund të vijojnë në varësi të intensitetit të reshjeve dhe zhvillimit të situatës në terren.
The post Mot i keq në Itali, shpallet alarm portokalli dhe mbyllen shkollat në disa qytete appeared first on Euronews Albania.
Burimi: Botë
