Sot, 29 janar, në Komisionin për Çështjet e Brendshme dhe të Mbrojtjes u diskutua projektligji që parashikon shtesa dhe ndryshime në ligjin për kontrollin shtetëror të transferimeve ndërkombëtare të mallrave ushtarake dhe teknologjive me përdorim të dyfishtë.
Ministri i Mbrojtjes, Pirro Vengu, theksoi nevojën për një kontroll më të fortë të zinxhirit të transferimit, duke adresuar rreziqet që nuk vijnë vetëm nga armët klasike, por edhe nga teknologjitë e reja, pajisjet civile që mund të shndërrohen në mjete survejimi dhe software që sipas tij që transferohen lehtësisht me “një klik”.
Risitë, siç i theksoi ministri, përfshijnë:
Përfshirjen e teknologjive kibernetike, transmetimeve elektronike dhe aksesit në distancë;
Integrimin e elementëve të respektimit të të drejtave themelore të njeriut në procesin e licencimit, duke përfshirë përdorimin e mundshëm për survejim të paligjshëm
Forcimin e mekanizmit “catch all” (sistem që kap çdo produkt që mund të shkaktojë rreziqe), që i jep autoritetit licencues të drejtën të ndërhyjë për kontrolle shtesë
Përforcimin e bashkëpunimit institucional
Ministri Vengu theksoi se ky projektligj përbën një piketë kyçe për procesin e negociatave të Shqipërisë me Bashkimin Evropian.
