Kuvendi i Shqipërisë ka miratuar ndryshime të gjera dhe thelbësore në Kodin Penal, në kuadër të përafrimit të legjislacionit shqiptar me të Bashkimit Evropian dhe forcimit të luftës kundër krimit të organizuar, terrorizmit, korrupsionit dhe shkeljeve të rënda ndaj të miturve.
Ndryshimet e votuara përfshijnë një paketë të gjerë masash që prekin juridiksionin penal, rritjen e dënimeve, zgjerimin e veprave penale dhe shtimin e garancive për mbrojtjen e interesit publik dhe të drejtave themelore.
Fokus te mbrojtja e fëmijëve dhe krimet seksuale
Një nga shtyllat kryesore të ndryshimeve lidhet me ashpërsimin e dënimeve për krimet seksuale ndaj fëmijëve. Kodi Penal tashmë parashikon dënime deri në 20 vjet burg, apo edhe minimum 20 vjet në rastet kur veprat sjellin vdekjen ose vetëvrasjen e të miturit. Për herë të parë kriminalizohet edhe përfshirja e fëmijëve si dëshmitarë të abuzimit seksual, organizimi i udhëtimeve për qëllime seksuale dhe shfrytëzimi i prostitucionit me të mitur në forma të zgjeruara.
Po ashtu, përdorimi i teknologjisë për shpërndarje materialesh me përmbajtje seksuale që përfshijnë të mitur konsiderohet rrethanë rënduese, duke rritur ndjeshëm masën e dënimit.
Terrorizmi dhe siguria kombëtare
Ndryshimet forcojnë ndjeshëm kuadrin penal kundër terrorizmit. Zgjerohet lista e veprave me qëllime terroriste, kriminalizohet propaganda, thirrja publike, trajnimi, udhëtimi dhe organizimi i udhëtimeve për qëllime terroriste, edhe nëse aktet nuk janë realizuar konkretisht. Dënimet për këto vepra shkojnë deri në 15 vite burg, ndërsa për pjesëmarrje në organizata terroriste parashikohet minimumi 15 vite heqje lirie.
Trafikimi, pastrimi i parave dhe fondet e BE-së
Kodi Penal përforcon dënimet për trafikimin e qenieve njerëzore dhe të miturve, duke sanksionuar edhe përdoruesit e shërbimeve të ofruara nga viktimat e trafikimit. Për herë të parë parashikohet vepër penale e posaçme për mashtrimin që cenon interesat financiare të Bashkimit Evropian, me dënime deri në 10 vite burg kur dëmi kalon 50 mijë euro.
Në fushën e pastrimit të parave, ligji lehtëson provën penale duke hequr detyrimin për të identifikuar autorin e veprës bazë, mjafton që të provohet origjina kriminale e pasurisë.
Ndërtimet e paligjshme dhe krimet mjedisore
Ndryshimet ashpërsojnë ndjeshëm dënimet për ndërtimet pa leje, veçanërisht kur kryhen në zona të mbrojtura, parqe natyrore apo nga funksionarë publikë. Në këto raste parashikohet rritje e dënimit deri në dy të tretat dhe ndalim i ushtrimit të funksioneve publike.
Po ashtu, rriten ndjeshëm dënimet për zjarrvëniet në pyje, sidomos kur kryhen në kushte që rrezikojnë jetën e njerëzve ose synojnë ndryshimin e destinacionit të tokës.
TemA
