Ministri i Mirëqenies Sociale dhe Rinisë në një takim me përfaqësues të call center në Shqipëri ka deklaruar se qeveria shqiptare do të negociojë me Italinë në mënyrë që ligji i ri që pritet të miratohet në Senat brenda muajit dhjetor të ketë sa më pak ndikim në aktivitetin e kompanive në Shqipëri.
“Keni mbështetjen e plotë të qeverisë shqiptare. Vlerësojmë punën e 804 kompanive tuaja, ku punojnë 25 mijë shqiptarë.
Do të negociojmë me qeverinë italiane që ligji italian të ndikojë sa më pak aktivitetin e kompanive” deklaroi ai.
Ndërsa ministrja Ekonomi theksoi se “kemi shqyrtuar ligjin, jemi të gatshëm për një qëndrim të përbashkët“.
Kryetari i shoqatës së Call Center në Shqipëri, Gentiam Drenova deklaroi se ligji italian ka filluar ndikimet e tij që tani te kompanitë, pasi disa janë tërhequr.
“Ligji italian po ndikon që tani te investimet, disa kompani janë tërhequr. Ligji mund të ndikojë në terma afatgjatë në kompanitë shqiptare” tha ai.
Rreziku se Italia mund të miratojë ligjin për delokalizimin e call center ka bërë që Ministria e Zhvillimit të Ekonomisë, Turizmit, Tregtisë dhe Sipërmarrjes të zhvillojë një takim me drejtues të Ministrisë së Mirëqenies Sociale dhe Rinisë dhe aktorë të tregut.
Përmes këtij projektligji qeveria italiane po tenton të forcojë masat ndaj fenomenit ‘dumping’ në sektorin sektorin e call center, që ka sjellë krizë në punësim. Në ligjin e ri nëse miratohet, parashikohen sanksione administrative deri në 150,000 euro nëse nuk zbatohet. Miratimi i ligjit sjell një rrezik të madh për Shqipërinë, pasi në sektorin e Call Center në Shqipëri janë punësuar rreth 25 000 persona.
ma.me
