Deputeti i Partisë Demokratike, Oerd Bylykbashi i ka bërë thirrje KQZ-së që të merret me uljen drastike të personave që u është refuzuar kërkesa për t’u regjistruar si votues nga jashtë. Gjatë fjalës së tij në seancë plenare, Bylybashi thotë se janë rreth 34 mijë persona që u është refuzuar kërkesa për t’u regjistruar për zgjedhjet e 11 Majit.
Oerd Bylykbashi: Të bëjmë thirrje si Kuvend që KQZ duhet me prioritet absolut pa humbur kohë dhe pa gjetur asnjëlloj justifikimi të merret me uljen drastike të numrit të personave që ju është refuzuar kërkesa për t’u regjistruar si votues nga jashtë. Nga 181 mijë e 746 zgjedhës me të drejtë vote nga emigracioni që deri pak më parë kishin bërë kërkesë, 34 mijë e 295 vetëve u është refuzuar kërkesa. Janë gati 19%, pra gati 1/5 e zgjedhësve që u është refuzuar kërkesa për t’u regjistruar. E kanë shprehur dëshirën dhe vullnetin ta kenë kontaktin me Shqipërinë.
KQZ duhet patjetër të merret në kohën që ka mbetur, në mënyrë të fokusuar për t’i ndihmuar që të bëjnë të mundur regjistrimin e tyre. Madje, data 4 Mars nuk do e pengojë KQZ-në, por deri në përmbushjen e 60-ditëshit para zgjedhjeve, të merret me secilin prej tyre. Këta e kanë bërë kërkesën, këta duhet të ndihmohen patjetër sepse shumica dërrmuese e ka dokumentacionin.
Më tej, Bylykbashi ka përsëritur kërkesën që t’i hapur rrugë votës të emigrantëve shqiptarë që nuk kanë dokumenta identifikimi të shtetit mëmë.
Oerd Bylykbashi: KQZ nuk duhet të fshihet pas procedurave të ftohta. 1 në 5 është refuzuar. Janë 34 mijë persona me të drejtë vote. Nëse KQZ do të ndjekë këtë linjë pasive, këta 34 mijë persona nuk do të votojnë dot. E përsëris, janë rreth 200 mijë persona pa dokumente, janë shtetas shqiptarë. Dokrrat e shtetit modern që na paskan pasaportën sovrane, lërini. Janë njerëz që e duan të drejtën. Është teknikisht e pmundur që ata të regjistrohen. Hapini rrugën që KQZ tq bëjë ndryshimet dhe ata të regjistrohen. Parlamenti të heqë çdo barrierë për të gjithë ata që duan të regjistrohen dhe të votojnë me datë 11 Maj.
