Mazhoranca kërkoi dje në komisionin parlamentar të sigurisë rritjen e buxhetit për Ministrinë e Brendshme. Gjatë prezantimit të projektbuxhetit të shtetit për vitin 2016 nga ministri i Brendshëm, Saimir Tahiri, deputeti socialist, Paulin Sterkaj kërkoi që vitin e ardhshëm të ketë rritje të pagave edhe për punonjësit e Gardës së Republikës.
Sipas tij, në projektbuxhetin e vitit të ardhshëm, Garda është lënë pasdore, ndërsa pagat rriten vetëm për punonjësit e Policisë së Shtetit.
Gjithashtu, Sterkaj ngriti edhe shqetësimin se nuk janë paguar dietat për punonjësit e Gardës. Sipas tij, janë 1700 forca të Gardës të cilët kryejnë detyra sublime, por që në projektbuxhetin e vitit të ardhshëm janë mënjanuar. Në përfundim, komisioni propozoi shtimin e buxhetit për Ministrinë e Brendshme, për të përfshirë edhe Gardën./ Shqiptarja.com
