Policia e Durrësit ka arrestuar një shtetas mbrëmjen e djeshme, i cili po tentonte të kalonte përtej kufirit 113 kilogramë Cannabis Sattiva.
Siç mësohet nga njoftimi i Policisë së Durrësit, gjatë mbrëmjes së djeshme është ndaluar një rast i trafikimit të lëndëve narkotike. Policia Kufitare, në bashkëpunim Sektorin për Narkotikët në Drejtorinë Vendore të Policisë dhe Doganën që mbikëqyr sistemin e skanerit, kane arritur të sekuestrojne në portin e Durrësit rreth 113 kg Cannabis Sattiva, teksa ka arrestuar në flagrancë poseduesin e saj, 39-vjeçarin Xhaferr Hoxha, banues në Durrës.
Arrestimi në flagrancë i këtij shtetasi u bë, pasi në vendin e quajtur vija e dytë në P.K.K. porti Durrës, gjatë kontrollit të ushtruar në kokën e trajlerit me targë AA 250 JA dhe trajlerit me targë ACR 470, në brendësi të ngarkesës me koli këpucësh u gjetën 120 pako të mbështjella me qese celefani me peshë rreth 113 kg lëndë narkotike e dyshuar e llojit Cannabis Sattiva. Materialet do t’i kalojnë Prokurorisë pranë Gjykatës së Shkallës së Parë për Krimet e Rënda, Tiranë, për veprime të mëtejshme për veprën penale”Trafikimi i lëndëve narkotike”.
Pak ditë më parë u proceduan 9 doganiere, pasi u akuzuan se me veprimet apo mosveprimet e tyre kanë lejuar kalimin një sasie të konsiderueshme lëndë narkotike nga porti i Durrësit, e cila më pas u kap nga forcat e Policisë Italiane.
ATSH
