Ministri i Jashtëm, Ditmir Bushati ka hedhur poshtë akuzat e opozitës lidhur me bisedimet me Greqinë.
Gjatë një deklarate për mediat, Bushati ka deklaruar se nuk bëhet fjalë për ndryshim kufijsh,por për një proces teknik për mirëmbajtjen e piramidave tokësore.
“Nuk bëhet as për ristrukturim kufijsh apo rishikim të kufijve. Janë të gjitha ligjet ndërkombëtare në funksion të kësaj çështje, me vendet fqinjë kemi marrëveshjet përkatëse për kufijtë, edhe me Greqinë duam të kopsitim të njëjtin proces. Kemi një draftmarrëveshje në diskutim sa i përket kufizimit të zonave detare dhe kemi dy propjektmarrëveshje në diskutim për piramidat dhe menaxhimin e incidenteve kufitare.Me tre projektmarrëveshjet e mbyllim të gjithë çështjen që është në diskutim sa i përket detit dhe tokës“, deklaroi Bushati
Shefi i diplomacisë shqiptare tha se negociatat vijojnë dhe dy vendet ndodhen akoma në proces bisedimesh.
“Siç ju kemi thënë negociatat nuk kanë përfunduar, jemi në proces bisedimesh. Nuk mund të them se do të përfundojë brenda dy javësh, pasi është një proces që do kohën e tij”, tha Bushati.
Një tjetër autorizim do të duhet nga Presidenti, dhe këtë herë për firmosjen në tërësi të marrëveshjes me shtetin grek.
“Ligji është i qartë për çdo raund bisedimesh pavarësisht se ligjin nuk e kërkon, Ministria e jashtme i ka bërë raport me shkrim Presidentit të Republikës dhe kryeministrit. Në momentin që do të hidhen negociatat në planin teknik më pas në bazë të ligjit do kërkojmë Presidentit autorizim për firmosjen e kësaj marrëveshje”, tha Bushati
Bushati tha se PD po dizinformon publikun, duke iu referuar deklaratave për Çamërinë, e atyre për pikat e naftës në det.
“Ka dezinformim nga PD dhe jo vetëm. Flitet për km katror det dhe për zona potencialisht naftëmbajtëse, gjoja për fshirje të nocionit të çështjes çame. Kam dëgjuar shumë të tilla gjatë kësaj periudhë dhe është e qartë që ka një tentativë të orkestruar. E kam thënë dhe herë të tjera , ne jemi të vendosur ta çojmë përpara axhendën me Greqinë. Në rastin e Shqipërisë ne kem një plus siç është Gjykata Kushtetuese, që ofron një ligj me rregulla se çfarë s’duhet bërë. Vendimi i Kushtetueses është një linjë e kuqe, dhe imponuese për ne. Por efekti i një Gjykatë nuk mund të ketë ndikim edhe në vendin tjetër.”, deklaroi Bushati
Javanews/a.ç
