Vetëm tri minuta, jo më shumë. Të sjell në mend këngën e Agron Berishës, por nëse ai donte vetëm pesë minuta me vajzën e ëndrrave, portierit të Juventusit, Gigi Buffon, i duhen dy më pak për të rishkruar historinë.
Nëse e ruan të paprekur portën në tri minutat e para të derbit kundër Torinos, Buffon vendos rekordin e ri të pathyeshmërisë në Serinë A.
Deri tani, rekordi mbahet nga ish-portieri i Milanit, Sebastiano Rossi, me 929 minuta pa pësuar gol. Duket gjë e lehtë që Juventus të përqendrohet e t’i dhurojë portierit rekordin, megjithatë precedenti “i frikshëm” ekziston. Madje pikërisht në derbi, edhe pse në një kohë kur asnjë nga lojtarët bardhezi, bashkë me trajnerin, nuk kishin ardhur ende në këtë botë. Më 22 tetor 1967, Torino mundi Juven 4-0 dhe Nestor Combin e hapi serinë e golave pikërisht në minutën e tretë.
Por, lojtarët e sotëm të Torinos nuk janë aq të shpejtë në shënimin e golave, edhe pse mund ta provojnë. Asnjë prej tyre nuk ka shënuar gol në tri minutat e para, i fundit ishte D’Ambrosio më 22 shtator 2013, kur shënoi kundër Bolonjës.
Immobile ishte shumë pranë javën e shkuar, kur shënoi në minutën e katërt, kundër Genoas.
