Politika monetare e Bankes së Shqipërisë ka marrë tashmë një natyrë më të fortë stimuluese gjatë vitit 2016.
Pas dy uljeve të njëpasnjëshme në muajt prill e maj, norma bazë e interesit ndodhet aktualisht në nivelin 1.25%.
Banka e Shqipërisë bën të ditur se, forcimi i stimulit monetar ka sjellë uljen e normave të interesit në të gjitha segmentet e tregut financiar, duke nxitur rritjen e konsumit dhe të investimeve private.
Banka e Shqipërisë gjykon se ambienti financiar i karakterizuar nga norma të ulëta interesi dhe nga likuiditet i bollshëm duhet të inkurajojë një qasje më pozitive të bankave ndaj kreditimit.
Sipas BSH-se, treguesit e shëndetit të sektorit bankar kanë ardhur në përmirësim, në përgjigje të gjallërimit të aktivitetit ekonomik dhe të masave të tjera të marra nga autoritetet shqiptare. Treguesit e likuiditetit dhe të kapitalizimit mbeten në parametra të mirë, ndërsa niveli i kredive me probleme – pavarësisht luhatjeve – është vendosur nën kontroll./a.k
