Kryeministri i Britanisë së Madhe, Keir Starmer ka bërë të ditur nënshkrimin e marrëveshjes ku Turqia ka blerë 20 avionë luftarakë Eurofighter Typhoon.
Ai e ka cilësuar nënshkrimin e kësaj marrëveshjeje si “një fitore për sigurinë e NATO-s”.
“Kjo marrëveshje historike me Turqinë është një fitore për britanikët, një fitore për industrinë tonë të mbrojtjes dhe një fitore për sigurinë e NATO-s”, tha Starmer, sipas deklaratës së qeverisë së Mbretërisë së Bashkuar.
Sipas tij, marrëveshja do të thellojë dhe forcojë sigurinë e NATO-s, duke rritur gjithashtu bashkëpunimin dypalësh në industrinë e mbrojtjes.
“Në të dy skajet e Evropës, Mbretëria e Bashkuar dhe Turqia janë jetësore për t’u përballur me sfidat e kohës sonë, dhe kjo do t’u lejojë forcave tona të armatosura të punojnë edhe më ngushtë së bashku ndërsa parandalojmë kërcënimet dhe mbrojmë interesat tona kombëtare”, shtoi Starmer në një konferencë të përbashkët për shtyp me presidentin turk Rexhep Tajip Erdogan.
Sipas qeverisë së Mbretërisë së Bashkuar, Sekretari i Mbrojtjes John Healey, i cili shoqëroi Starmer në Ankara, tha se “Turqia është një aleat i rëndësishëm i NATO-s dhe porta e Detit të Zi”.
“Duke i pajisur ata me avionë luftarakë Typhoon të nivelit të lartë, kjo marrëveshje do të forcojë mbrojtjen e NATO-s dhe do të na ndihmojë të gjithëve të jemi më të sigurt”, ka shtuar ai.
Starmer tha se me një marrëveshje të re dhe moderne të tregtisë së lirë, ata do të jenë në gjendje të veprojnë së bashku për sigurinë dhe luftën kundër terrorizmit, si dhe për migracionin, energjinë dhe shumë çështje të tjera.
Mbretëria e Bashkuar e sheh Turqinë si një vend me rëndësi ekonomike dhe strategjike në rritje.
