José Mourinho nuk është nga ata që mbeten pa fjalë, ka përherë diçka për të thënë, në çdo situatë. Nuk pushon kurrë, me histori humori, ngacmime, por një ditë shtangu në vend. Kështu shkruan Rob Beasley, gazetari që e njeh më mirë nga të gjithë dhe autor i librit “José Mourinho: Up close and personal”.
“Ishim në Los Angeles kur njeriu i pesë gjuhëve dhe një milion fjalëve ngriu. Chelsea ishte në turne në SHBA. Ishte akomoduar në Beverly Hills Hotel dhe të gjithë po prisnin në holl për autobusin e skuadrës për të shkuar në stërvitje. Unë isha ulur me Mourinhon, i cili po më tregonte për pushimet verore katastrofë në Brazil. Befas historitë e Josesë ndaluan. Jo vetëm ai, por i gjithë grupi ra në heshtje të menjëherëshme. Sy të zgurdulluar, nofullat të rëna poshtë dhe askush nuk lëvizte. Ky ishte efekti që ka Jennifer Aniston”, shkruan Beasley.
“José nuk ishte ndryshe. Ai bëri atë që bënë gjithë të tjerët në momentin që ylli i Friends kaloi përmes derës: Ngriu në vend, me vetëm sytë në lëvizje. Jennifer Aniston dukej absolutisht tërheqëse atë ditë dhe e kuptoi impaktin që pati tek ai grup burrash. Madje i hodhi edhe një shikim burrave të ngrirë, me një buzëqeshje të lehtë. Sapo u zhduk nga sytë, José ishte i pari që reagoi. “Punë dreqi, Brad Pitt, çfarë trapi”. Pitt ishte ndarë nga Jennifer një vit më herët për Angelina Jolie, por Mourinho u tregua i shpejtë të vinte në dukje se çfarë mendonte: ‘Jennifer Aniston një, Angelina Jolie Zero’”.
Me siguri që José në ato çaste mendonte atë që mendonin të gjithë meshkujt e pranishëm: Kush ishte ai burrë që do të hiqte dorë nga Jennifer Aniston?”, shkruan Beasley.
Dailymail/d.i.
