Përmes një VKM-je qeveria miratoi një vendim për të shpërblyer në masën e 6 pagave ata punonjës të tatimeve që do të tejkalojnë palnin e të ardhurave. Sipas VKM-së, shpërblimi, për të stimuluar punonjësit do të jepet një herë në çdo 6 muaj dhe është një lloj stimulimi që edhe bankat e nivelit të dytë përdorin përkarshi punonjësve të tyre.
Por një vendim i tillë nuk i ka tingëlluar mirë kreut të komisionit parlamentar të Ekonomisë, deputetit Erjon Braçe, i cili përmes një postimi në facebook e ka cilësuar si të pakuptueshëm këtë zgjedhje. Braçe ka kërkuar që më parë shpërblimet të shkojnë për pensionistët, invalidët, familjet me ndihmë sociale apo veteranët.
“Po lexoj e dëgjoj thuajse çdo ditë për shpërblime e rroga të tëra shpërblim për atë këtë, për ata e këta! Shikoni, nuk dua ti ha hakun e meritën policëve, ushtarakëve, zjarrfikësve, edhe këtyre tatimoreve (pavarësisht se nuk do e kuptoj kurrë shpërblimin për mbledhjen e të ardhurave), e kujtdo tjetër. Por ka radhë dhe çdo gjë duhet të ndjekë atë.
Të parët pensionistët, invalidët, familjet me ndihmë ekonomike, veteranët. Të paktë kështu e mendoj unë. Nis me të pamundurit.” Shkruan Braçe.
