“Sot nuk ka qytetar të Tiranës apo shqiptar që nuk e di se Lulzim Basha i ka dhënë Tiranës vizionin e një qyteti modern dhe europian me Bulevard të ri, terminal multimodal, transport modern pasagjerësh me tram, 200 projekte të realizuara në infrastrukturë, kopshte, shkolla e çerdhe, 25 mijë vende të reja pune, etj.”, është shprehur zëdhënesja e selisë blu, Reila Bozdo në një prononcim për mediat.
Nga ana tjetër Bozdo tha se ishte Rama ai që e betonizoi Tiranën dhe se përgjigjen popullore do e marrë më 21 qershor për varfërinë, papunësinë, eksodin e pasigurinë. Sipas Bozdos. Revolta popullore ka futur në depresion kryeministrin.
“Ndërsa Edi Rama si kryebashkiak betonizoi Tiranën, si kryeministër është përgjegjës për papunësinë, varfërinë, mjerimin, pasigurinë dhe eksodin. Por përgjigjen më të mirë do ta japin qytetarët më 21 Qershor. Qytetarët shqiptarë pyesin sot ku është Edi Rama?
Pse nuk ballafaqohet me popullin e tij? Pse fshihet pas papagajve të tij? Pse fshihet nëpër salla të errëta ku prezanton kandidatët larg syve të qytetarëve? Revolta popullore e ka futur sot në depression Edi Ramën por është e sigurt se me ndëshkimin që do marrë me 21 Qershor, nuk do të ketë doktor që ta marrë në dorë.”, mbyll deklaratën e saj nga selia e PD zëdhënësja Bozdo.
