Shqipëria bëhet gati për kualifikueset e botërorit Rusi 2018, por trajneri Gianni De Biasi është i vetëdijshëm se pas dy viteve nuk mund të përjetojë të njëjtën verë magjike si më 2016. Kuqezinjtë u kualifikuan në finalet e Euro 2016, ku qëndruan në pritje deri në ditën e fundit të ndeshjeve të fazës së parë, me shpresën se mund të kalonin më tej, falë fitores 1-0 kundër Rumanisë, e cila u siguroi vendin e tretë në grup.
Kualifikimi në finalet franceze ishte edhe për meritë të një formati favorizues, gjë që nuk mund të thuhet për botërorin.
Nga Evropa kualifikohen 13 skuadra, përveç Rusisë organizatore, dhe vetëm të parat e çdo grupi kalojnë automatikisht. E dyta më e keqe e nëntë grupeve eliminohet, ndërsa tetë të tjerat luftojnë për katër vende. Një format i tillë bëjnë që të kenë dhimbje koke edhe Spanja me Italinë, kundërshtarët më të mëdhenj të Shqipërisë në grup, ndërkohë që janë edhe Izraeli, Maqedonia, e Lihtenshtejni.
De Biasi e ka parasysh situatën dhe shprehet për “Il Gazzetino” se dy të mëdhenjtë do të kualifikohen për më tej.
“Kalojnë Spanja dhe Italia, mbetet për t’u parë se cila do të fitojë kreun e grupit, jemi dhe ne të Shqipërisë, Izraeli, Maqedonia dhe Lihtenshtejni”, thotë trajneri. Taktikë për të përgjumur kundërshtarët apo kështu e beson vërtet, mbetet për t’u parë.
Për evropianin, De Biasi tregon edhe emrat e protagonistëve që i pëlqyen më tepër: “Buffon është portieri që më pëlqeu më shumë, mes mbrojtësve Hummels, në mesfushë 18-vjeçari Renato Sanchez. Në sulm nuk e di, jo Cristiano Ronaldo, pasi vendosi pak, dhe as Eder, golshënuesi i finales. Në ndeshjen kundër Shqipërisë shkëlqeu për rastet e humbura”.
D.I.
