Sekretari në detyrë i FIFA-s, Markus Kattner hapi sot kongresin e organizmit më të lartë botëror të futbollit, i përfshirë kohët e fundit nga një sërë skandalesh.
Kongresi do të zgjedhjë edhe presidentin e ri si edhe do të miratojë një reformë të gjerë për një rifillim të ri.
Sheiku i Bahreinit, Salman Bin Ebrahim Al Khalifa, shefi i Konfederatës së Azisë, dhe sekretari i përgjithshëm i UEFA-s, Gianni Infantino shihen si dy kandidatët më të fortë për të zëvendësuar Joseph Blatter, i cili e ka drejtuar FIFA-n që nga vitit 1998.
I përballur me një hetim kriminal në SHBA dhe Zvicër, që ka përfshirë edhe gjashtë zyrtarë të tjerë të lartë, FIFA duhet të provojë sot se është e gatshme të bëjë reformat e domosdoshme, në atë që presidenti në detyrë Issa Hayatou e ka konsideruar si ”një moment vendimtar”.
“Bota i ka drejtuar sytë nga ne… Sidoqoftë, ne kemi mundësinë ta ndryshojmë këtë gjendje”, deklaroi Hayatou, në prani edhe të presidentit të KON-it, Thomas Bach.
Paketa e reformave kërkon tre të katërtat e votave dhe përfshin ndryshime menaxhimi ku parashikohen më pak fuqi ekzekutive për presidentin, limit mandati, më shumë gra në përfaqësim dhe më shumë transparencë.
Zgjedhja e presidentit kërkon dy të treta e votave në raundin e parë dhe shumicë të thjeshtë në të dytin.
ATSH / DPA
