Reshjet e dëborës dhe temperaturat e ulëta përfshinë pjesën më të madhe të qarkut juglindor.
Në Dardhë të Korçës trashësia e dëborës shkon deri në 10 centimetra.
Të gjitha akset rrugorë që lidhin Korçën me njësitë administrative janë të hapura. Gjithashtu, rrugët drejt pikave doganore, Goricë, Tre Urat, Qafë Thanë dhe Kapshticë janë lehtësisht të kalueshme. Vështirësi paraqet vetëm segmenti rrugor Boboshticë Dardhë për shkak të pranisë së mjegullës dhe akullit.
Reshjet përfshinë edhe malësinë e Krujës, ndërsa në parkun kombëtar të Qafështamës, trashësia e dëborës ka arritur deri në 20 centimetra.
Në të gjitha fshatrat e malësisë së Krujës, akset rrugore janë të kalueshme.
Në Rrugën e Arbrit dëbora bllokoi qarkullimin.
Edhe pse mjetet borëpastruese ndodheshin në terren, nuk është përballuar intensiteti I dëborës në bypassin e Murrizit.
Këtë të martë, është zhbllokuar kalimi për automjetet në këtë segment rrugor.
Në rrugën e Kombit, nuk paraqiten probleme në qarkullim. Reshjet e dëborës në verilindjen e vendit janë me intensitet më të ulët.
Për këtë vit, dëbora e parë ra edhe në Qafën e Llogarasë.
Borëpastrueset kanë bërë të mundur në orët e para të mëngjesit për të lehtësuar qarkullimin e automjeteve.
