Luçiano Boçi komentoi procesin e zgjedhjes së nënkryetarëve në Partinë Demokratike, proces pas të cilit humbi postin e nënkryetarit. Vendin e tij e zuri Belind Këlliçi.
“Momenti i votimit është moment i cili ka shumë elementë brenda, nuk është shumë i pastër si moment, është shumë subjektiv, nuk është shumë objektiv. Të dy kishim të njëjtat mundësi. Nuk e mendoj që Këlliçi ka lobuar më shumë. Këto janë gjëra që kanë relativitetin e vet. Nuk do hyj të gjej detaje”, tha Boçi në studion e “Puls” nga Bruna Çifligu, në A2CNN.
Kur u pyet mbi deklaratën e Berishës se “ky është ekipi më i mirë në histori”, Boçi u përgjigj: “Është e drejta e zotit Berisha të japë atë përcaktim. Është ekipi i kryetarit të partisë në këtë rast dhe është e drejta e kryetarit të partisë të japë mendim. Ai bën një ballafaqim të ekipeve në vazhdimësi. Ekipet varen edhe nga momentumi politik. Nuk është i njëjtë ky momentum me atë para katër vitesh, kur ne ishim para një situate shumë të vështirë dhe ku ishte në lojë ekzistenca e Partisë Demokratike. Flas për momentin që unë jam zgjedhur nënkryetar i Partisë Demokratike. Zakonisht ne si shoqëri vuajmë nga amnesia, por edhe partitë politike në Shqipëri vuajnë nga amnesia. Duhet të konsiderojnë dhe atë që ka kaluar dhe nuk mund të krahasohen situatat e njëjta. Pra, ishte krejt situatë ndryshe atëherë dhe s’mund të thuash që dhe ai ekip s’ ishte i mirë. Kemi një situatë krejt ndryshe tani për atë çka vjen, është e drejta e kryetarit të partisë që t’i japë cilësime të tilla”.
Më tej, Boçi u pyet edhe mbi “mulizmin”.
“Nëqoftëse unë do e kisha hedhur si tezë këtë, do kisha të gjithë të drejtën ta parashtroja dhe të jepja përgjigje. Përcaktimi i termave të tillë, se kemi dëgjuar me “izma” shumë gjëra, është e drejta e atyre që e transmetojnë dhe e diskutojnë. Nuk besoj që duhet të jem unë ai që përcaktoj dhe i jap vulën gjërave të tilla. Por, koha do tregojë shumë elementë. Ai mendimi, ai diskutimi që është i shëndoshë në PD nuk mund të shuhet. Po u shua diskutimi apo debati, atëhere do të thotë që ajo demokracia e brendshme çedon. Ndërkohë, unë e konsideroj si shenjë të demokracisë së shëndoshë të brendshme të Partisë Demokratike, faktin që mund të hidhen dhe teza të tilla me “izëm”. S’duhet të përqëndrohemi te termi dhe ta mbushim me negativitet”, tha Boçi.
