Deputeti i Partisë Socialiste Ben Blushi ka vijuar kritikat e tij ndaj qeverisë këtë radhë nga foltorja e Kuvendit të Shqipërisë.
Duke iu drejtuar kolegëve të tij si dhe duke iu përgjigjur për sulmet e fundit në adresë të tij për shkrimet kritikuese qe ka botuar ndaj qeverisë, Blushi tha se shumica duhet të korrektojë veten.
Deputeti i PS-së e ka quajtur ish-kryeministrin Sali Berisha një fantazmë, ndërsa tha se kolegët e tij dhe ministrat e ndjekin fantazmën e tij.
“Përshëndes kolegët të krahut të majtë që korrigjuan heqjen e nenit famëkeq që ai që s’ka mundësi të paguajë energjinë t’i sekuestrohet banesa. Por kjo ka edhe një rëndësi tjetër, kjo tregon se kjo shumicë ka mundësi të korrektojë veten, dhe ky është një frymëzim i madh për njerëz si puna ime që kanë vendosur të flasin. Për Shqiperine ka më shumë rendesi e verteta se sa partia, e verteta se sa PS. Kam folur për shumë vite për nevojën që ka Shqipëria, për uljen e cmimit të energjisë, për terrorin që u është ushtruar mbi të varfërit, per rritjen e papunësisë, borxhit publik, do vazhdoj ta bëj deri në frymen e fundit se kjo që ndodhi në këtë parlament sot edhe mua më jep pak shpresë. Sigurisht ka njerëz që nuk janë dakord me mua. Ka shumë kolegë që më kundërshtojnë se papunësia nuk është rritur, borxhi nuk është rritur. Unë i mirëkuptoj, siç ka edhe nga ata që duan të mbarojnë ndonjë punë me këtë qeveri. Të mbaroni punë duke më sharë mua, edhe këta i mirëkuptoj. Këta që akuzojnë për të mbaruar ndonjë punë për vete. Ka edhe disa të tjerë që më kanë thënë se unë flas me gjuhën e Saliut. Dua tu them diçka këtyre, që Saliu është një fantazmë dhe fantazma ose të ndjek ose e ndjek. Mua Saliu as më ndjek dhe as nuk e ndjek, e ndjekin ata që thonë se papunësia nuk është rritur. Kush po e ndjek Saliun ata që thonë se një shqiptar i varfër merr më pak para nga shteti apo ata që thonë se qeveria po i heq nga mjerimi. Kush po e ndjek Saliun, ata që rrisin çmimin e energjisë, apo ata që energjinë e shesin më shtrenjtë. Kush pra e ndjek Saliun më shpejt, ata që thonë se duhet të ulim borxhin, apo ata që kanë marrë 7 mld borxh”, tha Blushi.
Po ashtu deputeti socialist i mëshoi faktit se qeveria e sotme dhe asnjë kryetar partie nuk ka kurajon të pranojë se në parlament ka futur kriminelë. Sipas Blushit edhe pse e kritikon, Rama ka futur kriminelë në Kuvend njësoj si paraardhësi i tij Berisha, dhe për këtë ai do ta kundërshtojë shefin e mazhorancës.
“Fatkeqësisht po qeverisin këta si Saliu pa Saliun dhe unë këtë nuk mund ta pranoj, s’mund ta pranoj se njerëzit me të cilët kam marrë vota të jenë si Saliu. Këta sollën kriminelët por asnjë kryetar partie nuk ka kurajo të kërkojë falje për futjen e kriminelëve që vrasin që tregtojnë drogë. Si Saliu sillet ai që futi kriminelët apo unë që e kundërshtoj?’ – tha Blushi.
Redaksia Online
(JavaNews.al)
