Pas debateve në Kongresin e Partisë Socialiste, deputeti Ben Blushi i cili ka kërkuar hapjen e garës për kreun e partisë, ka komentuar në studion e “Top Story” në Top Channel përballë Sokol Ballës zhvillimet brenda selisë rozë.
Referuar nenit në statutin e ri të partisë sipas të cilit kryetari i partisë konfirmohet nëse fiton zgjedhjet e përgjithshme, Ben Blushi tha se votat e anëtarëve të PS janë në duar të vullnetit të Ilir Metës, që sipas tij mund të rrëzojë koalicionin.
“Statuti i ri thotë që kryeminstri është kryetar partie. Nëse Ilir Meta thotë largojmë Edi Ramën, dhe po marr si shembull bëjmë Taulant Ballën kryeministër, cfarë do të thotë kjo që ai bëhet kryetari partisë? Kjo është absurde. 100 mijë anëtarë të PS të cilët kanë të drejtë të zgjedhin kryetarin e një partie zëvendësohen me votën e një njeriu, të Ilir Metës, ky është ky nen”, tha Ben Blushi.
Më tej Blushi tha se nga Asambleja e PS u larguan ata që kanë kontribute 25-vjeçare dhe u afruan persona që kanë votuar për Sali Berishën. Ai i’u referuar rikthimit të ish-deputetit Bukurosh Stafa, që në vitin 2007 votoi në parlament për Bamir Topin president.
“Po të lexoj një mesazh nga anëtarë të PS në Kurbin. 50 kryetarë organiztash janë të papunë. Prandaj Edi Rama nuk do të votohet, se janë të gjtihë të papunë. Nga Asambleja dolën njerëz që kanë themeluar PS, Ndre Legisi, Luan Hajdaraga, Mirela Akrama, Maqo Lakrori, etj. Këta janë njerëz që kanë mbajtur Sali Berishën në kurriz, me kë u zëvendësuan këta: me Çiften dhe Bukuroshin. Morën një “çifte” nga Elbasani dhe e futën në Asamble se më shante mua. Ata që u hoqën e kanë mbajtur Saliun në kurriz, kurse ky Bukuroshi votoi për Saliun në 2007, heq ata që ishin kundër Saliut dhe merr këta që ishin me Saliun. Ky Çiftja është si past dhëmbësh i PD-së, republikan.”, tha Blushi.
Referuar punimeve të Kongresit, Blushi tha se Kongresi dështoi të realizonte 3 pikat kryesore për të cilat u mblodh tha ai.
“Kam kërkuar të ketë votim, dhe kjo u mohua, për të parë se sa mbështetje ka. Kongresi dështoi të bëjë atë që duhet të bënte, e para të vendoste garën për kryetar, nuk e bëri. E dyta duhet të mriatonte këtë statut, çka nuk e bëri. E treta duhet të miratonte pyejten e referendumit, çka nuk e bëri”, tha Blushi.
