Për më shumë se katër muaj lëvizja me këtë mjet elektrik në rrugët e kryeqytetit të Tiranës përbën vepër penale, e cila çon deri në sekuestrimin e mjetit. Ishte ky vendimi i Ministrisë së Brendshme në mesin e muajit tetor 2024, i cili ndaloi qarkullimin e monopatinave dhe mjeteve të tjera elektrike me synimin se do të duhej një afat kohor për përpunimin e një ligji i cili do të rregullonte pikërisht qarkullimin.
Por sot, mbas katër muajsh, ligji mungon dhe u bë shkak pikërisht kjo mungesë e ligjit që përdoruesit e monopatinave dhe aktivistë të ndryshëm të protestojnë përpara dyerve të Ministrisë së Brendshme.
“Unë kam një biznes të vogël, shërbim klienti që mua më ka falimentuar fare me këtë me këtë vendim që dha, për një muaj dhe vajti katër muaj. Ne po i bëjmë pagesa bashkisë, po i bëjmë të gjitha, jemi me rregulla, me të gjitha”, thotë një protestues për A2 CNN. “Kjo e cila na prek më së shumti ose drejtpërdrejt neve, si përdorues, por dhe si dhe si biznes. Edhe në qoftë se kjo situatë zgjat, ngelet vetëm për të shpallur falimentin”, thotë një tjetër.
“Nuk ka fajin ky mjet. Këtë mjetin e përdor të gjithë bota. Shkon në Greqi, në Gjermani, në Austri, kudo përdoret ky. Por problemi është rregullat dhe këto tre rregulla që ne kemi pritur që t’i nxjerrin, që janë skafandra, shpejtësia e kufizuar dhe korsitë e dedikuara, nuk kanë dalë. Katër muaj nuk e di çfarë bën kjo ministre që nuk i nxjerr”, thotë Rigels Xhemollari, nga Qëndresa Qytetare.
A ka rrugë ligjore që duhet ndjekur? “Patjetër që ka rrugë ligjore. Unë jam i sigurt që çdokush të cilit i është marrë monopatina duhet të shkojë në gjykatën administrative dhe ta marrë me gjyq mjetin e tij. Ose pasi i ka kaluar 30 ditë nga bllokimi në komisariat të shkojë ta tërheqë, sepse është e drejtë e tij”, thotë Xhemollari. “Dhe së dyti ka dhe rrugë tjetër, ku ministrja Albana Koçiu të paditet në prokurori si një shkaktuese dëmi dhe i bëjmë thirrje dhe KLSH-së të auditojë këtë sjellje dhe këtë akt të saj”.
Mes frikës së sekuestrimit të mjetit dhe nevojës për të lëvizur nga një cep në cepin tjetër të Tiranës, përdoruesit e mjeteve elektrike thonë se do të vijojnë qarkullimin, por në mënyrë më fshehtazi. Nevoja e një ligji është urgjente për ta pasi ju kursen kohë dhe para.
“Zgjidhja do ishte që të nxirresh projektligji. Të nxirret një rregullore, nxirren masat e sigurisë, të caktohen rrugët ku duhet ecur dhe të rregullohet si çdo gjë tjetër”, thotë një protestues.
