E ndërsa pritej votimi i marrëveshjes së demarkacionit në sallën e Kuvendit të Kosovës mesditën e sotme është hedhur gaz lotsjellës dhe seanca është ndërprerë dy herë. Gazi lotsjellës është hedhur nga deputetët e Vetëvendosjes, e cila është kundër marrëveshjes me Malin e Zi.
Të gjithë deputetët të cilët ishin të pranishëm në seancë kanë lënë sallën e Kuvendit. Deputetët që hodhën gazin lotsjellës janë Xhelal Sfeçla, Fitore Pacolli, Drita Millaku, Salih Zyba dhe Liburn Aliu, ndërsa janë përjashtuar nga seanca plenare.
Vetëvendosja e kundërshton marrëveshjen e demarkacionit, me argumentin se dëmton integritetin territorial të Kosovës. Gazi lotsjellës është një skenar i cili është i përsëritur në kuvendin e Kosovës, ku edhe gjatë qeverisjes së Isa Mustafës është hedhur disa herë.
Presidenti Hashim Thaçi ka dënuar veprimet e Vetëvendosjes, ndërsa shumica është shprehur e vendosur për të votuar marrëveshjen e demarkacionit. Seanca ka nisur që ditën e djeshme, ndërsa u ndërpre mbrëmë për të vijuar sot, tashmë pritet votimi./a.ç
