Një nga biznesmenët e gjobitur në Durrës nga Emiljano Shullazi, rezulton të jete me precedentë penalë në Itali dhe Shqipëri. Bëhet fjalë për biznesmenit Xh.T, që rezulton se në dhjetor të 2006 të jetë dënuar me 8 vjet burg për “Trafik të lëndëve narkotike” nga drejtësia Shqiptare. Xh.T, herë pas here është përfshirë në disa procese gjyqësore për sekuestrimin e pasurisë nga prokuroria e Krimeve të Rënda dhe prokuroria e Durrësit, por kohët e fundit dyshohet se ka pasur dhe shqetësimin e grupit të Emiljano Shullazit, i cili i ka vendosur disa gjoba financiare.
Pavarësisht kësaj, Xh.T që zotëron një kompani të tregtimit të materialeve ndërtimore edhe pse ka informuar në rrugë informale policinë dhe prokurorinë, nuk ka marrë guximin të bëjë kallëzim penal kundër Emiljano Shullazit dhe miqve të tij. E njëjta gjë ka ndodhur dhe me biznesmenin më të madh të naftës në Shqipëri, i cili nuk ka pranuar të bëjë kallëzim penal ndaj Shullazit, por është mjaftuar me informim jo zyrtar të organeve të drejtësisë për gjobat e vendosura.
Gazeta Shqiptarja.com mëson se Xh.T, ka vuajtur pak nga dënimi me 8 vite burg, pasi në muajin Prill 2010 ai është amnistuar në rrethana të çuditshme nga ish-presidenti Bamir Topi, amnisti kjo që i dha Xh.T lirinë nga burgu.
