Biznesmeni Nuredin Suli, i cili i ka shpëtuar një atentati me eksploziv ditën e sotme ka folur për herë të parë për mediat.
Në një prononcim për “News 24” Suli ka thënë se nuk ka konflikte të tjera përveçse me familjen Sula. Suli, i cili i ka shpëtuar edhe një atentati tjetër, rrëfen se banon afër qendrës tregtare ku ndodhi edhe ngjarja e sotme.
Ai tha se e parkon gjithmonë mjetin e tij në të njëjtin vend dhe se ditën e sotme shkoi të vizitonte një mik të sëmurë në QSUT.
Biznesmeni tregon se ka kërkuar mbrojtje për të vëllanë që në vitin 2013 nga Policia dhe i ka kërkuar kësaj të fundit që të shuajë konfliktin me familjen Sula.
Ai thotë se u njoftua se në automjet kishte lëndë eksplozive dhe se njoftoi menjëherë policinë.
Biznesmeni madje kritikon edhe Policinë, që sipas tij e ka etiketuar si person me precedentë penalë.
