JavaNews/ Prej ditësh mediat greke kanë dhënë raportime të shumta lidhur me arritjen e një marrëveshjeje mes Shqipërisë dhe Greqisë për paketën e çështjeve të pazgjidhura mes vendeve, ku vëmendja më tepër është përqendruar te çështja e “Detit”.
Kryeministrat e dy vendeve dhe Ministrat e Jashtëm kanë qenë konstant me deklaratat duke theksuar se “është bërë progres i madh drejt marrëveshjes”. Por, palët janë treguar të kujdesshme që thjesht të tregohen optimist, pa dhënë detaje dhe pa vënë “vulën” përfundimtare.
Duket se hedhja e këtij hapi të rëndësishëm është kushtëzuar ndjeshëm nga politika e brendshme e dy vendeve. Duket sikur në të dy shtetet, opozitat përkatëse “kanë rënë dakord për të mos rënë dakord” me paktin e mundshëm, sido që të jetë produkti final.
Mosbesimi ndaj mazhorancave është mjaft i madh në të dy vendet dhe opozitat përkatëse shprehen mosbesuese ndaj qeverisë së shtetit të tyre. Mjafton një deklaratë optimiste për marrëveshje, dhe akuzat “ndizen” nga opozita e njërit prej vendeve se “po dëmtohet interesi kombëtar”.
Pas takimit Rama-Cipras në Londër, opozita greke ka reaguar sërish lidhur me deklaratën e kryeministrit grek ku ky i fundit tha se “jemi shumë pranë marrëveshjes”, duke e interpretuar këtë si lëshim përballë Shqipërisë.
Opozita greke ka akuzuar Cipras për bisedime sekrete që dëmtojnë vendin. Reagimi ka ardhur nga partia kryesore e opozitës “Demokracia e Re”.
“Diplomacia sekrete e Cipras dhe Kotzias ka rezultuar në dëm kombëtar me marrëveshjen e Shkupit. Tani, njerëzit mësojnë të habitur për një marrëveshje të ngjashme që po diskutohet me Shqipërinë. Ne i kërkojmë Kryeministrit dhe ministrit të Jashtëm të informojnë menjëherë Parlamentin për çfarë negociojnë në fshehtësi me Tiranën”, thuhet në deklaratën e Demokracisë së Re shkruan JavaNews.
Por, edhe për opozitën shqiptarë takimi i dy kryeministrave është interpretuar në të njëjtën mënyrë si opozita greke: “po dëmtohet interesi kombëtar”.
Ish-kryeministri Sali Berisha, jo më larg se sot shkruan në rrjetet sociale se Shqipëria humbet nga territori i saj si dhe i fal Greqisë zonat e pasura me naftë e gaz natyror.
“Kryeministri i Greqise Cipras pohon publikisht marreveshjen e tij me Zografin e dyte per coptim te ri te trojeve shqiptare ne Londer! Ne kete marreveshje ‘Edvin Zografi’ i ka falur Greqise nje siperfaqe prej 1200 km dhe fushat e gazit dhe naftes me triliona fuçi nafte dhe meter kub gazi”, shkruan Berisha.
Ai akuzon kryeministrin Edi Rama se ka bërë marrëveshje antikombëtare njësoj siç opozita greke sot akuzoi kryeministrin Cipras.
Pyetja që ngrihet natyrshëm është: Cili prej vendeve është i humbur dhe cili i fituari? Apo të dy kanë marrë hakun në atë që mund të jetë arritur pas negociatave?
Sigurisht që ka pak informacione të detajuara se çfarë është arritur deri tani dhe nuk mund të dalim në konkluzione pa u njohur me dokumentin final, që sigurisht do të ketë nevojë për interpretimin e ekspertëve.
Por, ajo që mund të thuhet është se veç deklaratave politike, as opozitat e vendeve nuk po bëjnë më shumë për të nxjerrë informacione konkrete se si dhe pse cënohet interesi kombëtar nëse vërtetë është cënuar.
Ajo që shqiptarët presin nuk janë deklaratat politike, por faktet konkrete, se fjala vjen, po nëse ka të drejtë opozita greke që “Shqipëria po del e fituar nga marrëveshja”? Atëherë i bie që duke dëgjuar thirrjet politike të ngrihemi kundër një marrëveshjeje fitimprurëse për vendin.
Njëjtë edhe për të kundërtën, nëse me fakte vërtetohet se vendi ynë po cënohet atëherë shqiptarët kanë nevojë të dinë më shumë!/JavaNews/
Nga Andi Malasi
