Presidenti i Shteteve të Bashkuara Donald Trump nuk e lidh incidentin në Washington me luftën ndaj Iranit.
“Ngjarja nuk do të më pengojë të fitoj luftën në Iran. Nuk e di nëse kishte ndonjë lidhje, por sinqerisht, nuk besoj, bazuar në atë që dimë”- deklaroi Trump gjatë konferencës së thirrur pas të shtënave me armë në hotelin “Washington Hilton” gjatë darkës me korrespondentët e Shtëpisë së Bardhë.
Të shtunën, Trump anuloi udhëtimin e planifikuar drejt Pakistanit të të dërguarve të tij Steve Witkoff dhe Jared Kushner.
“Shumë kohë e humbur nëpër udhëtime. Përveç kësaj, ka përçarje të madhe mes udhëheqjes së tyre”- u shpreh presidenti duke iu referuar Republikës Islamike.
Ndërsa në një intervistë për median amerikane “Axios”, Trump konfirmoi se anulimi i udhëtimit nuk do të thoshte automatikisht rifillim i luftës me Iranin.
“Nëse iranianët duan të flasin, gjithçka që duhet të bëjnë është të na telefonojnë”- deklaroi presidenti i SHBA-së.
Më herët, delegacioni iranian u largua nga Islamabadi pasi zhvilloi takime me zyrtarët pakistanezë. Ministri i Jashtëm Abbas Aragchi pas bisedime me ndërmjetësit në Islamabad, u shpreh se kishte ndarë qëndrimin e Iranit për t’i dhënë fund luftës, por ende nuk kishte parë nëse Shtetet e Bashkuara ishin vërtet seriozë lidhur me përpjekjet diplomatike.
Këto të fundit kanë ngecur pavarësisht zgjatjes së armëpushimit nga Trump për të lejuar vazhdimin e bisedimeve mes palëve. Teherani e ka kushtëzuar rikthimin në tryezën e negociatave me heqjen e bllokadës detare amerikane ndaj porteve iraniane, një kërkesë që Trump e refuzon pasi fillimisht kërkon të arrihet një marrëveshje për t’i dhënë fund luftës.
