Ish-kryeministri Berisha pretendon se ish-drejtori i Antikontrabandës Tokësore, Ervin Kaja, është arrestuar në një operacion anti-drogë në Itali. Përmes një postimi në rrjetet sociale Berisha shprehet se kapja e tij është fshehur nga strukturat përkatëse në Shqipëri. Sipas Berishës Ervin Kaja, deri tre javë më parë drejtues i Antikontrabandes Tokesore të vendit, është kapur në një operacion antidroge të organizuar nga Drejtoria e Policisë e Udines në Itali. Ish-kryeministri shkon më tej kur shprehet se Kaja ishte një anëtar i një rrjeti të strukturuar kriminal, i cili po hetohej nga policia italiane që nga viti 2011, për trafikin e kokainës dhe nga Franca.
“Ai ka përdorur pozicionin e tij si drejtuesi i Antikontrabandes për trafikun e kokainës nga Italia në Shqipëri. Ky person ishte emëruar si drejtues i antikontrabandës ndërkohë që kishte precedentë penale. Në vitin 2012 është kapur në zonën e bllokut për armëmbajtje pa leje”, shkruan Berisha. Sipas tij, Ervin Kaja kishte lidhje shumë të forta në qeveri ndaj dhe arrestimi i tij ditët e para të prillit që kaloi, është mbajtur i fshehtë nga qeveria dhe administrata doganore. “Pas drejtorëve të drejtorisë operacionale të Policisë së Shtetit që u larguan si trafikantë droge, Pata dhe Ahmeti, arrestimi i Kajës dëshmon se në të gjitha kanalet shtetërore të kontrollit të trafikut të drogës mazhoranca e qelbësirave kishte emëruar trafikant droge. Largimi i Ervin Kajes nga puna është berë fiktivisht nëpërmjet komisionit disiplinor në mungesë të tij (jo për trafik droge por për mosparaqitje në punë)”, nënvizoi Berisha.
