Ministri i Drejtësisë Ylli Manjani, urdhëron Administratën e Drejtorisë së Burgjeve të nisë procedurat e përgatitjes së dokumentacionit për faljen e të dënuarit Hyqmet Spahollari, invalid i grupi të dytë i cili është dënuar me vendim të formës së prerë me 7.6 vite burg.
Spahollari u dënua pasi u kap me 100 gramë drogë në Elbasan në vitin 2011. “Që prej datës 20 korrik 2016 Spahollari i është caktuar një avokat falas nga ana e Komitetit të Ndihmës ligjore. Ndërkohë, ditën e sotme ministri Manjani ka urdhëruar edhe Administratën e Drejtorisë së Burgjeve që të fillojë procedurën e përgatitjes së dokumentacionit për faljen e të dënuarit. Manjani kërkon që këtij shtetasi t’i krijohet një mundësi ligjore qe t’i lejojë trajtim shëndetësor të specializuar në mënyrë përfundimtare” thuhet në një njoftim e Ministrisë së Drejtësisë.
Përmes një letre të hapur Hyqmet Spahollari, 61 vjeç, kërkonte ndihmë: “Jeta ime është në rrezik për arsye se zemra ime do edhe një unazë tjetër. Kështu më kanë thënë mjekët që më kanë vizituar”.
Më datën 15 tetor të vitit 2011 ai është arrestuar në qytetin e Elbasanit për akuzën “Prodhim dhe shitje të lëndëve narkotike të llojit heroinë”.
“Sasia ishte 100 gramë. Nga pastrimi që i bëri vetë policia rezultoi 4.7 gramë e pastër, tjetra përzierës. Për këtë sasi kaq të vogël filloi karvani i gjyqeve. Në Gjykatën e Elbasanit kam bërë 26 seanca. Gjashtë seanca të tjera në Apelin e Durrësit. Pra, gjithsej 32 seanca për 100 gramë, ose 4.7 gramë, quajeni si të doni. U dënova 7.6 vjet burg. Dua t’ju vë në dijeni se ekziston një ligj që një invalid i grupit të dytë, siç jam unë, duhet të dënohet me minimumin e nenit që e kap”, shkruante në letër ai.
