Ministri i Shëndetësisë Ilir Beqaj ishte i pranishëm në analizën vjetore të Fondit të Detyrueshëm të Sigurimit Shëndetësor. Në fjalën e mbajtur Beqaj renditi disa ndër reformat e ndërmarra në sektor, që sipas tij kanë përmirësuar shërbimin ndaj qytetarëve. Ai u ndal edhe tek abuzimet me fondet e rimbursimit, sa i takon skemës gjigande të rimbursimit fiktiv ku ishin përfshirë disa farmaci dhe që i kushtoi shtetit shuma të konsiderueshme financiare dëm ekonomik.
“Vitin e kaluar u përballëm me një ngjarje shumë të rëndë, me një skemë korruptive që dëmtoi Fondin e Sugurimeve. Përgjegjësitë individuale gjithsecili i mban individualisht, por duhet të punojmë që këto gjëra mos të ndodhin më, dhe fondi po punon në këtë drejtim ku janë arritur rezultate konkrete”, tha ministri Ilir Beqaj.
Ndërkohë Drejtoresha e Përgjithshme e Fondit të Sigurimit të Detyrueshëm të Kujdesit Shëndetësor, Vjollca Braho tha se skandali u arrit të zbulohej falë një kontrolli të brendshëm dhe u morën masa të prisheshin kontratat me farmacitë që kishin abuzuar.
“Subjektet kanë paraqitur receta false, u konstatua se midis depove dhe farmacive kishte lidhje, depot lëshonin fatura fiktive tek farmacitë të pa shoqëruara me barna, ndërsa farmacitë i paraqisnin pranë fondit këto receta për rimbursim. Pati zgjidhje kontratash për 20 subjekte farmaceutike”,- tha zonja Braho.
Sipas Brahos dëmi i konstatuar ishte 68 milionë lëkë.
Ndër arritjet Drejtoresha e FSDKSH-së, veçoi check up pa pagesë për moshat nga 45 në 60 vjeç dhe uljen e çmimit të barnave në masën 12,5%.
