Më në fund dhe për herë të parë Bayern Munchen e pranon se Robert Lewandowski mund të jetë blerja e madhe e radhës për Real Madridit. Konfirmimi vjen nga njeriu më i madh në klubin bavarez, Franz Beckenbauer. Presidenti i nderit shkruan në kolonën e tij në një ndër të përditshmet gjermane ndërsa analizon transferimet e klubeve të mëdha në Evropë.
“Robert Lewandowski është një kandidat i mundshëm për Real Madridit, cfarë nuk mund të thuhet edhe për Thomas Muller, i cili ka thënë se nuk dëshiron në asnjë mënyrë të largohet nga Bayern, çka bën që tifozët ta duan edhe më tepër”. Beckebauer paralajmëron për janar të nxehtë në transferimin e yjeve të futbollit si pasojë e fondeve të mëdha ekonomike që zotërojnë disa klube në Premier League si dhe të pezullimit me të cilin përballen Real Madridi dhe Atletiko, që nuk mund të bëjnë blerje në dy afatet e ardhshme kalimtare pas parregullsive që konstatoi Fifa në kontratat e tyre me futbollistë minorenë.
