Pas deklaratës së ministres së Punëve të Jashtme të Kosovës, Donika Gërvalla, se pa SHBA-në dhe NATO-n, BE-ja është një tigër prej letre ka reaguar menjëherë emisari i Shteteve të Bashkuara, Gabriel Escobar. Ai ka thënë se çdo rezultat pozitiv ka ardhur falë bashkëpunimit të perëndimit.
“Dhe më vjen keq që duhet të dalloj nga kolegia ime nga Kosova, por gjithçka pozitive që ka ndodhur në Ballkan, ka qenë kombinim i bashkëpunimit të BE-së dhe SHBA-së.”
Diplomati i lartë amerikan e ka përfshirë Kosovën në listën e vendeve, që kanë lidership populist, kjo pasi e ndau rajonin në dy pjesë.
“Rajoni është bërë një rajon me dy rrugë, njëra ku bëjnë pjesë vendet që janë në NATO, janë më staber dhe janë fuqishëm në rrugën drejt BE-së, dhe të tjera janë vendet që po konsumojnë vëmendjen dhe burimet e rajonit. Dallimet kyçe janë që shtetet që janë në NATO dhe që kanë pasur zhvillimet më të mëdha janë ato, që kanë tejkaluar sfidat e rivaliteteve etnike. Dhe ato që vazhdojnë të kenë lidership që beson se popullizmi, nacionalizmi e rivalitetet etnike janë rrugët përpara, janë ata që po shohin më shumë sfida.”
Ministrja e Punëve të Jashtme Kosovës, Donika Gërvalla, gjatë fjalës së saj në një nga panelet në Forumin e Dubrovnikut në Kroaci, ka theksuar se pa Shtetet e Bashkuara të Amerikës dhe NATO-n, Bashkimi Evropian nuk mund të garantojë paqe dhe siguri./m.j
